මෛත්‍රීපාල සිරිසේන මහතා විසින් ජනතාවට දුන් පොරොන්දු වලට අනුව, 20 වන ව්‍යවස්ථා සංශෝධනය සම්මත කිරීම, ස්වාධින කොමිෂන් සභා ස්ථාපිත කිරීම ආදී මුලික කරුණු යථාර්තයක් බවට පත්කර දැනීම සඳහා පුළුල් ප්‍රචාරක වැඩසටහනක් ක්‍රියාත්මක කරමින්, මහජන බලවේග ඒකරාශී කිරීමට 'මෛත්‍රීට ඉඩදෙන්න' සංවිධානය පිහිටුවන බව එහි ප්‍රධානියකු වන නීතිඥ රවී ජයවර්ධන මහතා පැවසිය.
රවී ජයවර්ධන මහතා පුජ්‍ය මාදුළුවාවේ සෝභිත හිමියන්ගේ 'සාධාරණ සමාජයක් සඳහා වූ ජාතික ව්‍යාපාරයේ' මාධ්‍ය ප්‍රකාශක වන අතර ම ශ්‍රී ලංකා ජාතික රුපවාහිනියේ අධ්‍යක්ෂ මණ්ඩල සාමාජිකයෙකි. ජනාධිපති සම්බන්ධීකරන ලේකම් නීතිඥ ශිරාල් ලක්තිලක මහතාද 'මෛත්‍රීට ඉඩදෙන්න' සංවිධානයේ ප්‍රධානියෙකු බව වාර්තාවේ.
කෙසේ නමුත් මෙලෙස මෛත්‍රීපාල සිරිසේන මහතා වටා රංචු ගැසෙන මෙම කණ්ඩායම් හී ක්‍රියාකාරිත්වයන් නිසා ජනාධිපතිවරයා, රටේ පුරවැසියා හමුවේ හෑල්ලු වීම සිදුවන බවටද චෝදනාවක් එල්ල වී තිබේ. පසුගියදා කොළඹ විහාරමහදේවි උද්‍යානයේ ජනාධිපතිවරයාගේ ප්‍රධානත්වයෙන් පැවැති 20 වන සංශෝධය සම්බන්ධයෙන් වූ සම්මන්ත්‍රණය සංවිධානය කරනු ලැබුවේද මෙම පිරිස විසින්ය. එය සම්පූර්ණයෙන්ම අසාර්ථක රැස්වීමක් වූ අතර ඊට ප්‍රමාණවත් ජනතා සහභාගිත්වයක් ඇති කිරීමට එම සංවිධායකයන් අසමත් විය.එසේම ජනාධිපතිවරයා ගේ ඇතැම් තීන්දු තීරණ කෙරෙහි මෙම කණ්ඩායමේ බලපෑම එල්ල වී ඇති බවත් පැවැසේ.
