මේ වන විට දිස්ත‍්‍රික්ක රැසකට බලපෑම් එල්ල කර ඇති නියං තත්ත්වය හේතුවෙන් පවුල් තුන්ලක්ෂ 23, 476කට අයත් පුද්ගලයන් එකලොස් ලක්ෂ 50, 994 දෙනෙකු තවමත් පීඩාවට පත්ව සිටින බව ආපදා කළමනාකරණ මධ්‍යස්ථානය ප‍්‍රකාශ කළේය. ඉන් වැඩිම පිරිසක් වාර්තාවන්නේ කුරුණෑගල දිස්ත‍්‍රික්කයෙනි.  එම සංඛ්‍යාව හාරලක්ෂ 73, 125 කි.  හම්බන්තොට දිස්ත‍්‍රික්කයට බලපා ඇති නියං තත්ත්වය හේතුවෙන් පුද්ගලයින් එක්ලක්ෂ 6420ක් පීඩාවට පත්වී ඇත. 

උතුරු, උතුරු මැද, නැගෙනහිර, ඌව පළාත්වල ජලාශවල ජල මට්ටමද පවතින වියලි කාලගුණික තත්ත්වය හමුවේ තවදුරටත් අඩුවී තිබේ. වාරිමාර්ග  දෙපාර්තමේන්තුවේ ජලවිද්‍යා අංශයේ අධ්‍යක්‍ෂිකා ජානකී මීගස්තැන්න මහත්මිය කියා සිටියේ අඛණ්ඩව මෙම තත්ත්වය පැවතුනහාත් පානීය අවශ්‍යතා සඳහා පමණක් ජලය නිකුත් කිරීමට සිදුවන බවයි.

නියං කාලගුණ තත්ත්වය බලපා ඇති දිස්ත‍්‍රික්කවලට ලබන ඔක්තෝම්බර් මස මැද වනතුරු වැසි අපේක්ෂා කළ නොහැකි බවද කාලගුණ විද්‍යා දෙපාර්තමේන්තුව ප‍්‍රකාශ කළේය.

මේ අතර නියඟය පවතින බොහෝ ප‍්‍රදේශවල ජනතාවට එදිනෙදා අවශ්‍යතා සඳහා මෙන්ම පානීය ජලය ලබාගැනීමද  බරපතල ගැටළුවක් වී තිබේ.