කෙසේ නමුත් මේවන විට දිස්ත්‍රික් වශයෙන් ශ්‍රිලනීපයේ ප්‍රාදේශීය නායකයන් කැඳවා ඉදිරි පළාත් පාලන මැතිවරණයට සූදානම් වීම වෙනුවෙන් නැවත පක්ෂය ප්‍රතිසංවිධානය කිරීමේ කටයුත්තක ශ්‍රීලනීපය යෙදී සිටී. මහින්ද රාජපක්ෂ මහතා හා මෛත්‍රීපාල සිරිසේන මහතා අතර ශ්‍රි ලනීපය දෙකට බෙදීයාම හේතුවෙන් තවමත් ශ්‍රිලනීපය පැහැදිලි ස්ථාවරයක් සහිතව ඒකරාශි ඉරීමේ අර්බුදය සමනය වී නැත. එමෙන්ම ශ්‍රීලනිපය එජාපය සමඟ හවුල් ආණ්ඩුවකට යැමද ශ්‍රිලනීපයේ බොහෝ පාක්ෂිකයට ඉවසුම් නොදෙන්නක් වී තිබේ. මේ තත්වය මත ඉදිරි මාස 6 තුල විශේෂයෙන්ම ශ්‍රිලනීප පාක්ෂිකයා වත්මන් දේශපාලනය, එනම් යුගයේ දේශපාලනය කුමක්ද යන්න තේරුම් නොගතහොත් අනාගත ජයග්‍රහණයද වලක්වා ගැනීම සිදුවනු ඇත. කෙටිකාලිනව බලය අත් පත් කර ගැනීමේ මෝඩ කල්පනාවන් ඉවතලා දීර්ගකාලින ජයග්‍රහණයක් වෙනුවෙන් මේ මොහොත අත්නොහැරියහොත් ශ්‍රිලනීපයේ ගමනක අවසානය මිස වෙනකක් සිදුවන්නේ නැත.
සන්ධානය සමඟ ගනුදෙනු කළ ඇතැම් සුළු පක්ෂ වල නායකයන් හා 'දේශපාලය'යනු කුමක්දැයි පුළුල් අර්ථයකින් තේරුම් ගැනීමේ නොහැකියාවෙන් පෙළෙන ශ්‍රීලනීපයේ ඇතැම් නායකයන්ගේ ලනු කා පක්ෂය විනාශ කර ගැනීමට පාක්ෂිකයා අවනත නොවිය යුතුය. මහින්ද රජපක්ෂ විසින් පක්ෂයත් රටත් විනාශ කර නොදැම්මා නම් ශ්‍රී ලනිප පාක්ෂිකයාට අද මෙම උභතෝකෝටිකයට මුහුණ පාන්නට සිදු නොවේ. ජනාධිපති සිරිසේන මහතා පැහැදිලිවම උත්සහ ගනිමින් සිටින්නේ විනාශ වූ රටත් පක්ෂයත් නැවත ගොඩ නැගීම වෙනුවෙනි. ඒ ගැන කිසිදු තර්කයක් නොමැත. මේ මොහොතේ එජාපයට ඉඩ දී ඔහු බලා සිටින්නේ රටට අවශ්‍ය කරන විශාල පිම්මක් එජාපය මඟින් ලබා ගැනීම වෙනුවෙනි. ඊට රනිල් වික්‍රමසිංහ හැර වෙනත් සුදුස්සකු නැති බව ජනාධිපතිවරයා හොඳින් දනී. කඩා වැ‍ටුනු ආර්ථිකය හා ජාත්‍යන්තර බලපෑම ජය ගත හැක්කේ රනිල් වික්‍රසිංහට මිස ශ්‍රිලනිපයේ රාජපක්ෂ ක්‍රමයට හැඩ ගැසුනු ගොබ්බයන්ගේ වැඩ වලින් නොවන බව ඔහු දනී.
මේ වසර කිහිපයක සංක්‍රාණ්තික යුගය පසු කිරීමට ශ්‍රීලනීප පාක්ෂිකයා දේශපාලන වශයෙන් මුහුකුරා නොගිය හොත් යළි එජපයෙන් බලය අතට ගන්නවා බොරුය. එජාපය විසින් ඉ‍ටුකළ යුතු යුග මෙහේවර ඉක්මනින් අවසන් කරන තෙක් ඉවසිය යුතුවේ. ඊට ඉඩ දෙන්න. සහය දෙන්න. ශ්‍රීලනීපයට අවස්ථාව ලැබෙන්නේ ඉන් අනතුරුවය. මන්ද යුග කාර්ය භාරය අවසන් වූ පසුව එජාපයද රටේ අනාගතය සම්බන්ධයෙන් වෙනස් තීරණයක් ගත යුතුය. ඒ මොහොතදී ශ්‍රීලනීපයට ප්‍රබල නායකත්වයක් අනාගතවාදී දැක්මක් පුළුල් සංවිධාන ශක්තියක් නොමැති වුවහොත් එජාපය පහසු ජයග්‍රහණයක් අත් කර ගන්නවා නියතය.
මේ ඉතා හොඳින් දන්න වීරවංශලා වැනි වර්ගවාදීන් උත්සහ ගනිමින් සිටින්නේ රට මේ මොහොතේ යම් ජයග්‍රහණයක් අත්පත් කරමින් සිටිනවාද ඒ විනාශ කිරීමටය. මන්ද ඔවුන්ගේ බල පෙරේත කම මෙරට දෙකෝටියක් වන ජනතාවගේ යහ පැවැත්මට වඩා වැදගත් ලෙස කල්පනා කරන නිසාය. සැබැවින්ම බණ්ඩාරනායක මහතා සඟ වෙද ගුරු ගොවි කම්කරු පංචමහා බලවේගය ඒකරාශී කර ශ්‍රිලනීපය නැමැති ප්‍රගතිශීලී පක්ෂය ගොඩ නැඟුවේ රටේ අභිවෘද්ධිය වෙනුවෙන් මිස මේ කාලකණ්නි වර්ගවාදී බඩගෝස්තරවාදීන්ගේ ප‍ටු වුවමනාවන් ඉ‍ටු කිරීමට නොවන බව සැබෑ ශ්‍රීලනීප පාක්ෂිකයා නොදන්නවා නොවේ. මේ ඒ ප්‍රතිපත්ති ක්‍රියාවට නැගිය යුතු කාලයකි. බණ්ඩාරනායක මහතා ද විනාශ වූයේ මෙවැනි වර්ගවාදීන් හුරතල් කිරීමේ ප්‍රතිවිපාකයක් ලෙසිනි. රජපක්ෂ මහතාද ශ්‍රි ලනීපය විනාශ කළේ මේ වර්ගවාදීන් වැද්ද ගැනීම නිසාය. ඒ වැරද යළි වෙන්නට ඉඩ නොතැබිය යුතුය.
- කළණමිත්‍ර
