මෙම පදවි ප්‍රාප්තිය වෙනුවෙන් සිදුකරනු ලැබු සියලු කටයුතු වලින් ජනාධිපතිවරයා එක් වසරක් තුල මහා ප්‍රජාතන්ත්‍රවාදියකු ලෙස ගොඩනගා ගත් පෞර්ෂය එක රැයකින් විගඩම්කාරයකු කරනු ලැබීමේ මෙහෙයුම ප්‍රචාරක ක්ෂෙත්‍රයේ කටයුතුවලට සම්බන්ධ හෝ සම්බන්ධ වීමට බලාපොරොත්තුවෙන් සිටින පුද්ගලයන්ට නම් හැදැරීමට වටිනා එකකි.
මෑත කාලයේ මෙවැනි බහුභූත ප්‍රචාරක ව්‍යාපාරයක් අප දු‍ටුවේ නැත. පසුගිය රාජපක්ෂ රෙජීමය සමයේදී මහින්දව රජෙකුට ඇන්දවීම ඉතා සියුම්ව ක්‍රමානුකූලව ඉහළ තාක්ෂණික හා සංකල්පීයම ලෙස දියුණු ප්‍රචාරක උපක්‍රම අනුව සිදු විය. අදටත් මහින්ද රට බේරා ගත් මහ රජ්ජුරුවන් ලෙස සැලකෙන්නේ එම ප්‍රචාරක ව්‍යාපාරයේ තිබූ ශක්තිමත් භාවයය. ඒ අහලකින්වත් මේ මෛත්‍රීගේ විගඩම් ප්‍රචාරක ව්‍යාපාරය තැබිය නොහැක.
මෛත්‍රීපාල සිරිසේන මහතාගේ ජනාධිපතිවරණ ප්‍රචාරක ව්‍යාපාරයද මෙලෙසම බහුභුතයන් අත පැවැති අතර ඔහුට වාසිදායක වුයේ 'අපමණ අගයක් රටකට ඕනෑ..‘ ආදි වශයෙන් සිදු කෙරුණු තේමා ගීතයම පමණකි. එය තමන්ගේ පරාජය කෙරෙහි දැඩිව බලපෑ බව මහින්ද පාර්ශ්වය පවා පිලිගත් කරුණකි.
අපට දැනෙන ආකාරයට ජනාධිපතිවරයා කරන්නේ කුමක්ද කියන්න කුමක්ද යන්න ගැන ඔහුටවත් තේරුමක් ඇත්තේ නැත. නැත්නම් ඔහු වටා සිටින බහුභූත උපදේශයන්ට ඔහුව හිතෙන හිතෙන ලෙස අන්දන්නට ඉඩදී ඔහු බලා සිටිනවාද විය හැකිය. කොහොම නමුත් මෙවර පදවිප්‍රාප්තයේ කටයුතු ජනාධිපතිවරයාගේ දැනුම්වත් භාවය හෝ ආශිර්වාදය ඇතිව සිදුවූවා නම් රටටම අබසරණයි කියනවා හැර අපට කීමට දෙයක් නැත.
පසුගිය ජනවාරි 08 වැනිදා වියරු රාජපක්ෂ රෙජීමය පරදවා ලත් ජයග්‍රහණය විසින් ඉල්ලා සිටියේ මෙවැනි සිංහල බෞද්ධ විගඩම් පාලකයකු නොවේ. හණ මිටි කර ගහගෙන යන මෝඩ පාලකයකු නොවේ. අවශ්‍ය වූයේ නූතනවාදී පාලකයෙකි. ලෝක යතාර්තය පිලිගත හැකි පාලකයෙකි. මේ ගෝත්‍රික රට ශිෂ්ඨ සම්පන්න යුගයක් දක්වා ගෙන යා හැකි පාලකයෙකි. ඒ සඳහා ශක්තිමත් කෂේරුකාවක් ඇති නායකයකි. ප්‍රජාතනත්‍රවාදය යන්න ප්‍රායෝගික යතාර්ථයක් ලෙස ජනතාව හමුවේ තැබිය හැකි පාලකයකි.
රාජපක්ෂලා සිංහල බෞද්ධ වෙස් මූණූ දමා ගත්තේ උපක්‍රමික දේශපාලන වුවමනාවන් වෙනුවෙන් මිස අවංකව නොවේ. ඒ ඔවුන්ගේ පැවැත්ම වෙනුවෙන් යොදා ගත් අතර අවසානයේ රට වර්ගවාදී වෛරයෙන් පුරවනු ලැබිණි. අදත් එයින් රටට ගැලවිය නොහැකිව තිබේ. කොටින්ම ජනාධිපතිවරයා හා ඔහුගේ බහුභූත උපදේශකයන්ද එහි ගොදුරු බවට පත්ව ඇති බව ඉතාම පැහැදිලිය. එය මෛත්‍රීපාල සිරිසේන ජනාධිපතිවරයා හෝ ඔහුගේ බහුභූත උපදේශකයන් තවමත් නොදන්නවාට සැකයකුත් නැත. නැත්නම් මෙවැනි විගඩම් සිදු කරන්නේ නැත. තමන්ගේ හුදු දේශපාලන පැවැත්ම ගැන පමණක් හිතන ඒකාධිපති මෝඩ පාලකයකුට නම් මේවා ගැලපෙන වැඩය. එමෙන්ම එය මානසික රොගී තත්වයකි.
පිස්සකු යටතේ පාලනය වන්නට තරම් තවම රට අවාසනාවන්ත නැතැයි කල්පනා කරමු. කොහොම නමුත් ජනාධිපතිවරයා තමන් කරන්නේ කුමක්ද කියන්නේ කුමක්ද යන්න ගැන දැන්වත් සිහිබුද්ධියෙන් කල්පනා කරන්නේ නම් ඒ රටේ ජනතාවගේ වාසනාවක් විය හැකිය.
