අලුත්ගම මාලේවන ඥාණීස්වර මහා විද්‍යාලයේ සහ අලුත්ගම සහිරා විද්‍යාලයේ මහින්දෝදය තාක්ෂණිය විද්‍යාගාර විවෘත කිරීම පසුගියදා සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්නගේ ප්‍රධානත්වයෙන් සිදු කෙරින. එහිදී සෞඛ්‍ය ඇමැතිවරයා මෙම අදහස් පළ කරන ලදි.
මෙහිදී අදහස් දැක්වූ සෞඛ්‍ය අමාත්‍යවරයා - '2017 ජනවාරි 01 සිට පෞද්ගලික අංශයෙන් සිදුකරන සියළුම රුධිර පරීක්ෂණ තහනම් කරනවා. 2017 ජනවාරි 01 සිට සියළුම රජයේ රෝහල්වලින් ලේ පරීක්ෂණ සිදු කිරීමට අවශ්‍ය කටයුතු සුදානම් කරනවා. එතකොට රුධිර පරීක්ෂණ පෞද්ගලික අංශයෙන් සිදු කිරීම ජනවාරි 01 සිට තහනම්. ඒ සදහා සියළුම රෝහල්වලට රුධිර පරීක්ෂණ යන්ත්‍ර ලබාදෙනවා. එමෙන්ම එන සතියේ දුම්කොළ සමාගම්වලින් සියයට 90 බද්ද අය කිරීමේ කැබිනට් පත්‍රීකාව මම ඉදිරිපත් කරනවා.”
මේ වනවිට පිළිකා රෝගීන් සදහා නොමිලේ ඖෂධ ලබාදීමට මම දැනුම් දී තිබෙනවා. ඇතැම් පිළිකා රෝගියෙකුට ඖෂධ ලබාදී අවසන් වනවිට රුපියල් ලක්ෂ 50 - 60 ක වියදමක් දරන්න සිදු වෙනවා. නමුත් නිදහස් සෞඛ්‍ය සේවාව ආරක්ෂා කර ගැනීමේ අරමුණින් මම මේ පියවර ගත්තා. රුපියල් ලක්ෂයක්වත් දැකපු නැති ජනතාව ඉන්නවා.
නමුත් පිළිකා ඖෂධයක් රුපියල් ලක්ෂ දෙකහමාරක් වගේ වෙනවා. එහෙම අය කොහොමද එවැනි මුදලක් වැය කරලා ඖෂධ ලබාගන්නේ. එම නිසා පිළිකා සදහා ඖෂධ වාර්ෂිකව රෝගීන්ට ලබාදීමට වැයවන රුපියල් කෝටි 1200 ලබාගැනීම සදහා කැබිනට් සන්දේශයක් ඉදිරිපත් කිරීමට ද බලාපොරොත්තු වෙනවා. හෘද සැත්කම් සදහා අවශ්‍ය ස්ටෙන්ස් නොමිලේ ලබාදෙනවා. අක්ෂි කාචත් ලබාදෙනවා. බෙහෙත් හිඟක් දැන් නැහැ. මාධ්‍ය ඔස්සේ කියවෙන්නෙත් නැහැ. මාස 02 කට අවශ්‍ය තරම් ඖෂධ සෞඛ්‍ය අමාත්‍යාංශයේ වෛද්‍ය සැපයුම් අංශයේ ගබඩා කොට තිබෙනවා. දුෂණ ටෙන්ඩර් පටිපාටිය සෞඛ්‍ය අමාත්‍යාංශය තුළින් ඉවත් කරනවා. අගෝස්තු මස 31 වනවිට ඖෂධ මිල අඩු කිරීමේ ගැසට් පත්‍රය ජාතික ඖෂධ නියාමණ අධිකාරිය විසින් ප්‍රකාශයට පත් කිරීමට සුදානම්න් සිටින්නේ. ඒ පිළිබද මා ඖෂධ වාණීජ මණ්ඩලය සමග සාකචිඡා කළා. ඖෂධ මිල සියයට 85 ක් දක්වා අඩු කළ යුතුයි. එයයි මගේ බලාපොරොත්තුව.”
