කෙසේ නමුත් ඇය මෙරටින් පලා යාම පසුගිය වසරේදි සිදුව තිබේ. එය සිදුවී ඇති ආකාරය පිළිබඳ තොරතුරු අප වෙත වාර්තා වී ඇත.
විශ්වාසවන්ත එම ආරංචිමාර්ග වලට අනුව පසුගිය වසරේ වූ ආණ්ඩු පෙරලියත් සමඟ ඇය පළමුව ඉන්දියාවටත් එතැනින් සිංගප්පූරුවටත් පළාගොස් ඇති අතර පසුව ඩුබායි බලා ගොස් ඇත. අවසන් වරට ඇය අබුඩාබි නගරයේ ජාත්‍යන්තර සමාගමක නීති කලමණාකාරියක ලෙස සේවය කර ඇති අතර ඇගේ සොහොයුරන් එංගලන්තයේ වෙසෙයි. ඔරනෙල්ලා ඉරේෂා සිල්වා මේ වන විට එංගලන්තයේ සිටින බවට ඇතැම් මාධ්‍ය වාර්තා පළවී ඇත්තේ එම සොයුරන් වෙත ඇය යන්නට ඇති බව උපකල්පනය කිරීම නිසාය.
නමුත් අප වෙත තොරතුරු වාර්තා වන අන්දමට තවමත් ඇය එංගලන්තයට ගොස් තිබෙන බව ස්ථීර කරන සාක්ෂි කිසිවක් ලැබී නැත. කෙසේ වුවද ඇය යුරෝපීය රටකට පළායාම සඳහා උත්සහ දරා ඇති බවත් එම රටවල් අතර එංගලන්තය පමණක් නොව ඉතාලිය සහ ප්‍රංශය ද වන බව වාර්තා වෙයි.
එම රටවල් අතරින් ඔරනෙල්ලා ඉරේෂා සිල්වා ගේ උපන් රට වන ඉතාලිය වෙත යාමට පාර්ශ්ව කිහිපයක් හරහා උත්සහ ගෙන ඇති බවද වාර්තා වන අතර අධිකරණය විසින් ජාත්‍යන්තර වරෙන්තුවක් නිකුත්කොට ඇති නිසා එම පාර්ශ්ව ඇයට උපකාර කිරීම මඟ හැර ඇත. මේ අයුරින් ඇය ඉතාලිය වෙත පළායාමට උත්සහ දරමින් සිටින්නේ ඉතාලි නීතිය අනුව අන්තර්ජාතික පොලිසියට වුවත් ඉතාලි දේශසීමා තුළදී සැකකරුවකු ක්ෂණිකව අත්අඩංගුවට ගැනීමට නොහැකි නිසාය. මේ වන විට මෙරට පාතාල සාමාජිකයකු වන කොස්ගොඩ නදුන් නැමැත්තාද අන්තර්ජාතික වරෙන්තු ලබා ඇතත් ඔහු තවමත් ඉතාලි ආරක්ෂක අංශ නිවාස අඩස්සියේ තබාගෙන සිටියි. ඔරනෙල්ලා ඉරේෂා සිල්වාගේ උත්සාහයද බොහෝවිට එවැන්නක් විය හැකිය.
මේ වන විට රාජපක්ෂ රෙජීමයේ විදෙස් සහයකයින්ද ඔරනෙල්ලා ඉරේෂා සිල්වා සොයා ගැනීම සඳහා උත්සහ කරමින් සිටින බවද වාර්තා වෙයි. ඒ රාජපක්ෂ වරු අයතා ලෙස උපයන ලද වත්කම් විදේශගත කිරීමේ මහ මොළකාරිනිය ඇය වන නිසාය. රාජපක්ෂ වරුන් වෙනුවෙන් ඉරේෂා සොයාදීමේ කොන්ත්‍රාත්තුව පුද්ගලයින් ඇගේ සොහොයුරන් වාසය කරන ප්‍රදේශය වෙත ගොස් ඇය පිලිබඳ සොයාබලා ඇත. කෙසේ වුවත් මේ වන විට ඇය රාජපක්ෂ පවුල සමඟ ද සබඳතා අත්හිටුවා ඇති බවද වාර්තා වෙයි.
ඔරනෙල්ලා ඉරේෂා සිල්වා කලක් මහරගම වත්තෙගෙදර පුරාණ පාරේ වාසය කළ අතර ඒ සමයේ සිරි වජිරඤාණ දහම් පාසලේ අධ්‍යාපනය ලබා ඇත. පසුව ඇය නීති විද්‍යාලයට ඇතුලත් වන අතර ඇය එහි සිටි දක්ෂතම ශිෂ්‍යාවකි. ඇයගේ දෙමාපියන් කලක් ඉතාලියේ සේවය කර ඇති අතර ඒ නිසාම ඉරේෂා මෙන්ම ඇගේ වැඩිමහල් සහෝදරයා වන බෲනෝ සිල්වා සහ අනෙක් සොයුරා වන හෙන්රි සිල්වාද උපත ලබා ඇත්තේ ඉතාලියේය.
