ශ්‍රීලංකාවේ නව චීන තානාපතිවරයා ලෙස පත්ව ආ එරට දේශපාලන නියෝජිතයා රාජපක්ෂවරු සමඟ පසුගියදා සාකච්ඡාවක් සිදු කර තිබූ අතර මීට දින කිහිපයකට පෙර මෙරට ඇමරිකානු සහ ඉන්දිය තානාපති අංශවල දේශපාලන නියෝජිතයන් බැසිල් රාජපක්ෂ සමඟද සාකච්ඡා කිරීම සිදුව තිබේ.
සාමාන්‍ය හමුවීම වලින් ඔබ්බට ගොස් වත්මන් සම්මුතික ආණ්ඩුවේ දේශපාලන ස්ථාවරත්වය හා උතුරේ දේශපාලන වර්ධනයක් ගැන මෙහිදී සාකච්ඡා කර ඇති බව දැන ගැනීමට තිබේ.
තවත් වසර දෙකකින් මහා මැතිවරණය හා ජනාධිපතිවරණය පැවැත්වීමට නියමිත බැවින් එහිදී පොහොට්‍ටු කණ්ඩායමේ මැදිහත් වීම මෙරට දේශපාලනයේ තවත් තීරණාත්මක හැරවුමක් වනු ඇති බව මතු වෙමින් තිබේ.
එම මැතිවරණ පොහොට්‍ටු පක්ෂය වෙනම තරග කිරීමටත් තවත් කණ්ඩායම් ඒකරාශි කර ගැනීමටත් මේවන විට කටයුතු කරමින් තිබේ. විශේෂයෙන්ම බැසිල් රාජපක්ෂ දෙමළ හා මුස්ලිම් සංහිඳියාව වෙනුවෙන් පෙනී සිටින අතර එය පසුගිය මහින්ද පාලනයේ ජාතිවාදී ස්ථාවරය අභිබවා ගිය ප්‍රගතිශීලී දැක්මක් සහිත බවද පෙනෙන්නට තිබේ.
වත්මන් සම්මුතික ආණ්ඩුව සංහිඳියාව සම්බන්ධ ප්‍රශ්නය නිරාකරණය කර ගැනීමට අසමත් වීමත්, පොරොන්දු වූ දේශපාලන ප්‍රතිසංස්කරණයන් සිදු කිරීමට අසමත් වීමත් නිසා මේ වන විට ජාත්‍යන්තර වශයෙන් නොහොඳ නෝක්කාඩුවකට ලක්ව සිටී. මෙම ප්‍රතිසංස්කරණ ක්‍රියාවලියට ජනාධිපතිවරයාගේ පාර්ශ්වයෙන් සහයෝගය නොලැබීම මත ඒ දිනෙන් දින කල් යවමින් තිබේ. මේ නිසා ජාත්‍යන්තරය බලපෑම් කණ්ඩායම් වල මීලඟ තේරීම වෙනකක් විය හැකිය.
