රාජ්‍ය මාධ්‍ය මෙය වාර්තා කර තිබුණේ මෙසේය..
" රුසියාවේ හිටපු තානාපති උදයංග වීරතුංග මහතා ඩුබායි බලධාරීන් විසින් ඊයේ (26) උදෑසන දී අත්අඩංගුවට ගෙන ඇති බව පොලිස් මුල්‍ය අපරාධ කොට්ඨාශය (FCID) භාර ජ්‍යෙෂ්ඨ නියෝජ්‍ය පොලිස්පති රවීන්ද්‍ර විද්‍යාලංකාර මහතා පවසයි.
FCID ය මගින් සිදුකරන ලද විමර්ශන හා ලබාදුන් තොරතුරු පදනම් කරගනිමින් උදයංග වීරතුංග මහතාව අත්අඩංගුවට ගෙන ඇති අතර ඔහුව මෙරටට ගෙන්වා ගැනීම සම්බන්ධයෙන් ඩුබායි බලධාරීන් සමග තවදුරටත් සාකච්ඡා සිදුවෙන බවද පැවසේ."
එය කෙසේ නමුත් පොලිස් දෙපර්තමේන්තුව, ප්‍රවෘත්ති දෙපාර්තමේන්තුව. හෝ වෙනත් රජයේ වගකිව යුතු ආයතනයක් අද (27) මේ මොහොත ( රාත්‍රී 9.30) වන තුරුත් මේ පුවත සනාත කිරීමට සමත්ව නැත. මේ සම්බන්ධයෙන් අප කළ වීමසීම් වලදි මෙය පැහැදිලි විය.
උදයංගගේ ගුවන් ගමන් බලපත්‍රයක වූ දෝශයක් නිසා එක්සත් අරාබි රාජ්‍යය විසින් පසුගිය පෙබරවාරි 4 වැනිදා උදයංග වීරතුංගව පොලීස් අත්අඩංගුවට ගනු ලැබූ අතර පසුව මුදා හරිනු ලැබුවෙ රටින් පිටවීමට අවසර නොදෙමිනි. ඒ අනුව ඊයේ දිනයේදී ඔහුගෙන් එරට ප්‍රශ්න කිරීමක් සඳහා අත් අඩංගුවට ගත් බවට වාර්තා වුයේ ඔහුට දමා දිබූ කොන්දේසි කිහිපයක් කඩ කිරීම සම්බන්ධයෙන් බවටද තොරතුරු වාර්තා විය . එය කිසිසේත්ම මෙරට නිකුත් කළ නිල් හෝ රතු වරෙන්තුවක් අනුව ජාත්‍යන්තර පොලිසියේ හෝ මෙරට පොලිස් නිලධාරීන් එරටට ගොස් සිදු කළ අත් අඩංගුවට ගැනීමක් නොවන බවත් දැන ගැනිමට තිබේ.
එහෙත් මෙම ව්‍යාජ පුවත ඊයේ දිනයේ සිට රාජ්‍ය මාධ්‍ය මුල් කරගෙන ප්‍රචාරය වූයේ ජනාධිපති කාර්යාලයට සම්බන්ධ තැනකින් මාධ්‍යට ලබාදීම නිසා බවද තොරතුරු දැන ගැනීමට තිබේ.
ජනාධිපති මෛත්‍රීපාල සිරිසේන හා මහින්ද රාජපක්ෂ අතර මේ වන විට විශ්වාසභංග යෝජනාව හරහා ඇති වී තිබෙන අලුත් මිත්‍ර සමාගම සමාජයෙන් වසන් කිරීම වෙනුවෙන් මෙම පුවත නිර්මාණය කළාද යන සැකයක් ඇති බව මේ සම්බන්ධයෙන් තතු දත් අය පෙන්වා දෙති.
ජනාධිපතිවරයා ප්‍රතිපත්තිමය තීන්දුවක් ලෙස රාජපක්ෂවරුන්ට එරෙහිව තිබෙන චෝදනාවලින් ඔවුන්ව නිදහස් කරවීමට තීන්දු කර තිබෙන බව රහසක් නොවන අතර ඒ අනුව රාජපක්ෂ පවුලේ සමීපතම ඥාතියකු වන උදයංග වීරතුංගට අගතියක් වීමට ඉඩ දෙතැයි කල්පනා කළ ද නොහැක. අනික් කාරණය නම් උදයංග සම්බන්ධ මිග් යානා ගනු දෙනුවේ ප්‍රධාන චූදිතයා ගෝඨාබය රාජපක්ෂ වීමය. ගොඨාගේ ඇඟේ මයිලකටවත් හානියක් කිරීමට ජනාධිපතිවරයා ඉඩ නොතබන බවත් පැහැදිලි කරුණකි.
මේ අනුව උදයංග අත් අඩංගුවට ගැනීමේ පැරඩිය ජනාධිපති පාර්ශ්වය විසින් නිර්මාණය කළ බොරුවක් බවට සැක කළ හැකිය.
