හිටපු සෞඛ්‍ය අමාත්‍යවරයා විසින් පත්කරන ලද කමිටුවක් අහෝසි කරන ලෙස ඉල්ලමින් රජයේ වෛද්‍ය නිළධාරීන්ගේ සංගමයේ නිළධාරීන් මෙම ගැටුමට මුලපුරා ඇත.
ශ්‍රී ලංකා වෛද්‍ය සභාවේ නව සභාපති වෛද්‍ය පාලිත අබේකෝන් මහතාට මෙම කමිටුවක් අහෝසි කරන ලෙස ඉල්ලමින් ලිපි දෙකක් යොමුකර ඇති බව රජයේ වෛද්‍ය නිළධාරීන්ගේ සංගමයේ නිළධාරීන් පවසා ඇති අතර රජයේ වෛද්‍ය නිලධාරීන්ගේ සංගමයේ සභාපතිවරයා වෛද්‍ය පාදෙනිය විසින් ප්‍රකාශ කර ඇත්තේ තම සංගමයේ ඉල්ලීම මත ඉහත කමිටුව විසිරුවා හරින ලද බවය.
එහෙත් මෙම කමිටුව පත් කරන ලෙස හිටපු සෞඛ්‍ය අමාත්‍ය වරයාගෙන් එවකට වෛද්‍ය සභාව විසින් ඉල්ලීමක් ඇති බව එම සාමාජිකයන් පෙන්වා දී ඇති අතර පාදෙනිය එම ප්‍රකාශයට වෛද්‍ය සභාවේ සියළු ම සාමාජිකයින් සිය විරෝධය පලකර ඇත. ඉන් කෝපයට පත් වෛද්‍ය නවීන්ද සොයිසා විසින් මහාචාර්ය හරේන් ද සිල්වා මහතාට බැනවැදි පහරදීමට ද සූදානම් වී ඇති අතර වෛද්‍ය සභාවේ උප සභාපතිනියගේ හා අනෙකුත් සාමාජිකයින්ගේ මැදිහත්වී මහාචාර්යවරයා පහර කෑමෙන් බේරාගෙන තිබේ. එහි දී ඉන් පිටව ගිය සාමාජිකයින් පවසා ඇත්තේ මෙවැනි හැසිරීමක් වෛද්‍ය සභාව තුල කිසිදු දිනක සිදු නොවී ඇති බවත් අඩු උනේ මිරිස්කුඩු බවත්ය.
ශ්‍රී ලංකා වෛද්‍ය සභාවේ නව සභාපතිවරයා වශයෙන් පත් කර තිබෙන වෛද්‍ය පාලිත අබේකෝන් මහතා මෙම අවස්ථාවට සහභාගී වී නැති අතර වෛද්‍ය සභාවේ උපසභාපතිනිය විසින් දැනුම් දී ඇත්තේ නව සභාපතිවරයා විසින් එම තනතුර ප්‍රතික්ෂේප කර ඇති බවයි.
සෞඛ්‍ය පෝෂණ හා දේශීය වෛද්‍ය ඇමැති චමල් රාජපක්ෂ පසුගිහ දා වසර 5 ක් සදහා බලපැවැත්වෙන පරිදි වෛද්‍ය පාලිත අබේකෝන් මහතා පත් කිරීම සිදුකර ඇත.
එම පත්වීම් ලිපිය වෛද්‍ය නවීන්ද සොයිසා විසින් රැගෙණ විත් තිබූ අතර එහිදී වෛද්‍ය සභාවට මෙම පත්කිරීම සිදුකර ඇත්තේ රජයේ වෛද්‍ය නිලධරීන්ගේ සංගමයේ උවමනාවට බව උලුප්පා පෙන්වීමට උත්සාහ කර ඇති බවට වාර්තා වේ.
එහි දී වෛද්‍ය සභාවේ සාමාජිකයින් පවසා ඇත්තේ මෙය දේශපාලන අතපෙවීමක් බවත් මෙවැනි ක්‍රියාවත් ඉතිහාසයේ කිසිදු දිනක වෛද්‍ය සභාව තුල සිදුව නොමැති බවත් ඒ අනුව වෛද්‍ය පාලිත අබේකෝන් මහතා අපහසුතාවයට ලක්කර ඇති බවත් මෙම තණතුර භාර නොගැනීමට මෙය එක හේතුවක් බවත් පෙන්වා දී ඇත.
