ඇවන්ට්ගාර්ඩ් නම සමඟ රාජපක්ෂවරුන්ගේ නම් කියැවෙන විට පරළ වෙන ජනී ජනයා ටක්කෙට්ම හිතුවේ මේ මෙරට 'ඇවන්ට්ගාර්ඩ්' සමාගම රාජපක්ෂලා සමඟ කළ මගඩියක් බවය. එහෙත් ඉතා පැහැදිලිව මෙම සමාගම ජාත්‍යන්තර සමාගමක් වූ අතර මෙරට ඇවන්ට්ගාර්ඩ් සමාගම නොවේ. එහි අනුබද්ධ සමාගමක් හෝ නොවේ. මෙය දකුණු ඇමරිකාවේ ගයානා (Guyana) රාජ්‍යය මුලස්ථානය කරගත් සමාගමකි. Avant Garde- Surface Safety Solutions

එම සමාගම සම්බන්ධයෙන් පැහැදිලිව කෝප් කමි‍ටුව හමුවේදී අනාවරණය කළ නමුත් මෙරට ඇතැම් මාධ්‍ය ආයතන පවා ඒ ඇත්ත නොතකා නොදැන හෝ වුවමණාවෙන්ම මේ සම්බන්ධ තොරතුරු ප්‍රචාරය කර තිබුණේ මෙය නිශ්ශංක සේනාධිපති සභාපතිත්වය දරණ මෙරට පිහිටි ඇවන්ට්ගාර්ඩ් සමාගම විසින් කළ මගඩියක් බව හැඟවෙන පරිදිය. මෙරට ඇවන්ට්ගාර්ඩ් සමාගම කිසිදු මගඩියකට සම්බන්ධ බවට මෙතෙක් සාක්ෂි සහිතව ඔප්පු වී නැත. එයට එරෙහිව එල්ල වූ සියළු චෝදනාවලින් අධිකරණය විසින් නිදොස් කොට නිදහස් කළ සමාගමකි.

එමෙන්ම මේ සම්බන්ධයෙන් කෝප් කමිටු සාමාජික පාඨලී චම්පික කමි‍ටුවේදී අදහස් දක්වන්නේ ද ඒ මෙරට පිහිටි ඇවන්ට්ගාර්ඩ් සමාගම බවට හැඟීමක් ජනිත වන ලෙසය. එසේම පසුව පෙරටුගාමී පක්ෂයේ පුබුදු ජාගොඩ මාධ්‍ය හමුවක් තබමින් ඇවන්ට්ගාර්ඩ්, ඇවන්ට්ගාර්ඩ්, යනුවෙන් පුනරුච්චාරණය කරන්නේ මේ නිශ්ශංක සේනාධිපති සභාපතිත්වය දරණ ඇවන්ට්ගාර්ඩ් සමාගම මෙම මගඩියට සම්බන්ධ බව හැඟවෙන පරිදිය.

මේ වෙන කොට සමාජ ජාලා තුළද මෙම පුවත සංස්රණය වන්නේ මේ වැරදි සහගත කරුණ පදනම් කරගෙනය.

කියන්නා කෙසේ කීවත් අසන්නා සිහි බුද්ධියෙන් යුතුව ඇසිය යුතු බවට කියමනක් වෙයි. එහෙම නොවුණු විට සිදු විය හැකි පැටලැවිලි තමන්ට හෝ වෙනත් පාර්ශ්වකට හානි ගෙන දිය හැකිය. දැන් වී ඇත්තේ එයය.

මෙතන බරපතලම වැ‍රැද්ද සිදු කරන්නේ ස්වාධීන අපක්ෂපාත මාධ්‍යකරුවන් ලෙස පෙනී සිටින්නන් දැන දැනම තිබෙන තක්කඩි කමට මේ වැරැද්ද කිරීමය. අදාල වීඩියෝ පට අවශ්‍ය ලෙස සංස්කරණය කර, වැරදි තොරතුරු සහිත වාර්ථා සහ පෝස්ටර් නිර්මාණය කරමින් වැරදි අදහසක් සමාජගතකරමින් රට වැසියා නොමඟයවමින් සිටී.

පසුගිය දින කිහිපයේදී අප මෙවැනිම මාධ්‍ය වර්තා කිහිපයක්ම හුවා දක්වමින් මේ සිදු කරන ජඩ මාධ්‍ය භාවිතය ගැන හෙළි කළෙමු. එහිදී ද අප පැහැදිලිවම කියා සිටියේ ජන මාධ්‍ය කරණය මෙතරම් පහත් නින්දිත තැනකට ඇද දමමින් මේ සිදුකරන ජඩ මාධ්‍ය භාවිතය නැවැත්විය යුතු බවය.

https://www.lankadaily.com/latestnews/featured/item/12718-cybernews

https://www.lankadaily.com/latestnews/featured/item/12712-avantgarde-prison-incident-may-09

අද අරගලයක් කරමින් රට වෙනස් කළ යුතු බව, සිස්ටම් චේනජ් කළ යුතු බව කියන අරගලකාරීන්ම මේ පහත් නින්දිත ක්‍රියාදාමයේ යෙදී සිටීම කණගා‍ටුවට කරුණකි. මෙවැනි තුට්‍ටු දෙකේ වැඩ කරන අරගලකරුවන් කියන පිරිස සමඟ ගොඩනැගිය හැකි අලුත් රටක් නැත. ඔවුන් මේ අරගලය නමින් කරන්නේ ද වංචාවක් තක්කඩිකමක් විය හැකිය.

මේ නිසා ජනතාව මේ ජඩ මාධ්‍යවේදීන්ගෙනුත්, ජඩ අරගල කරුවන්ගෙනුත් , ජඩ දේශපාලකයන්ගෙනුත් පරිස්සම් විය යුතුය. නැතිනම් යළි වැටෙන්නේ මේ වැටී සිටින නරා වළට වඩා දහදුරා නරා වළකටය.

-SJ