මේ මොහොතේ කරළියට පැමිණ ඇති නවතම මාතෘකාව බවට පත්ව ඇත්තේ ජනාධිපතිතුමා සහ හිටපු ජනාධිපතිතුමා ගේ හමුව යි.

ශ්‍රී ලංකා නිදහස් පක්ෂයේ සභාපති ධුරය ජනාධිපතිතුමා වෙත භාර දී පසෙකට වූ හිටපු ජනාධිපති පරාද වන බව දැනගත් මොහොතේ සිට උත්සුක වූයේ කෙසේ හෝ බලයේ රැදී සිටීමට ය. එහෙත් ඒ සියලු උත්සාහ අසාර්ථක වූ විට ඔහුට සිදුවූයේ වලිගය දෙපරැන්ද අස්සේ ගසාගෙන පසු බා යන්ට ය. ‘‘කොපමණ ගුණ කළත් දුදනෝ නොවෙති යහපත්’’ කියන්නා සේ ඔහු සිය නිවසට ගොස් ඉසිඹු ලත් පළමු මොහොතේ ම ජනේලයෙන් පැන ජනතාවට පවසා සිටියේ ‘‘එයා දිනුවෙ කොටි ඡන්දෙන්’’ කියා ය. පසුගිය සමයේ ‘‘කොටි’’ යන වචනය වැරදිලා හෝ කියවුණා නම් ඒ පුද්ගලයාට සිදුවන්නේ කුමක් ද යන්න අමුතුවෙන් කිව යුතු නැත. එහෙත් හිටපු ජනාධිපති යළි යළිත් ජාතිවාදය නමැති අසූචි ගොඩ අවුස්සන්නට උත්සුක වූයේ මෛත්‍රීපාල සිරිසේන ජනාධිපතිතුමාගේ ජයග්‍රහණය අවතක්සේරු කොට, ඔහු බලයෙන් පහ කර හැරීමට මග පාදා ගැනීම සදහා ය.

එතැන් සිට විවිධ පුද්ගලයන් සහ කණ්ඩායම් සමග එක්ව පවතින ආන්ඩුවට එරෙහි විවිධ දෝෂාරෝපණ මෙන් ම අවලාද නගන්නට හිටපු ජනාධිපතිතුමා කටයුතු කළේ ඉතාමත් නිර්ලජ්ජිත අන්දමිනි. එය කෙතරම් නිහීන වූයේ ද යත් රටේ රසික රසිකාවියන්ගේ නොමද පැසසුමට ලක් වූ එක් ගායිකාවක් පවසා සිටියේ ‘‘ගහල හරි, මරල හරි’’ නැවත මහින්ද රාජපක්ෂ බලයට පත් කළ යුතු බවයි. රටේ හිටපු ජනාධිපති ඉදිරියේ කලාකාරියක් කියාගන්නා මේ ත්‍රස්තවාදිනිය මෙතරම් බලහත්කාරී වදන් පවසන්නේ කිසිදු බියකින් තොරව ය. හිටපු ජනාධිපතිවරයා ද ඒ සියල්ල අසා සිටින්නේ රටේ පවතින නීතිය පිළිබද අබැටක් තම් හෝ නොසිතමිනි; එකී ප්‍රකාශය කළේ ළදරුවකු යැයි උපකල්පනය කරමිනි.

මේ සියලු කාරණාවන් මෙසේ සිදුව තිබිය දී මහින්ද ඔසවාගෙන යන්නට තැත් දරන කිසිවකුගේ ජනරැලියකට හෝ සහභාගි නොවන්ට ඔහු තීරණය කරන්නේ එහි යථාර්ථය අවබෝධ කරගෙන සිටින බැවිනි. එහෙත් දැන් සිදුව ඇත්තේ රජාගේ බත්බැලයන් අනාත වීම ය. මාළිගාව කඩා වැටිමට පෙර මේ බැලයන් එය වළක්වාලීමට නොයෙක් වෙර දැරි ය. එය නොහැකි වූ විට අනෙක් පාර්ශවය ඉදිකළ මාළිගාවේ ලගිමින් ම ඒ මාළිගාවේ යුවරජු එළවා දැමීමට පිඹුරුපත් සකසයි.

විපක්ෂය නමින් පෙනී සිටින මේ කුමන්ත්‍රණකරුවෝ මෙසේ හැසිරෙද්දී ජනාධිපතිවරයා හිටපු ජනාධිපති සමග යළි සාකච්ඡා අරඹන්නට සැරසේ.

මේ කුමක් සදහාද? කවුරුන් උදෙසා ද? කාගේ වුවමනාවකට ද? හිටපු ජනාධිපති යනු ත්‍රස්වාදියෙක් ද? ඔහු සමග සාම ගිවිසුම් අත්සන් කළ යුතු ද? ‘‘අනේ අපිටඅපේ පාඩුවෙ ඉන්න දීල ඔබතුමා ඔබතුමාගේ වැඩක් කරගන්න’’ යැයි කියා ඔහු ඉදිරියේ බැගෑපත් විය යුතු ද? ඔහුගේ කුමන්ත්‍රණ හේතුවෙන් මෛත්‍රිපාල ජනාධිපතිතුමා බිය වී ඇත් ද?

මේ ප්‍රශ්න සියල්ල ලියුම්කරුගේ පුද්ගලික ප්‍රශ්න නොව: පැවති දුර්ධාන්ත පාලනය අවසන් කිරීම සදහා ඡන්දය ලබාදුන් හැට දෙලක්ෂයක් වූ ජනතාවගේ ප්‍රශ්න ය; මෛත්‍රීපාල සිරිසේන නම් වූ පොදු අපේක්ෂකයා රටේ ජනාධිපති පුටුවේ අසුන් ගැන්වීම සදහා ඡන්දය ලබාදුන් හැට දෙලක්ෂයක් වූ ජනතාවගේ ප්‍රශ්න ය; ශ්‍රී ලංකාව නම් වූදේශයේ අනාගත අභිවෘද්ධිය සදහා ඡන්දය ලබාදුන් හැට දෙලක්ෂයක් වූ ජනතාවගේ ප්‍රශ්න ය.

ජනතාව ගේ ඡන්දයෙන් බලයට පත් වු රටක බලය යළි බලහත්කාරයෙන් ලබාගන්නට යම් පුද්ගලයෙක් හෝ කණ්ඩායමක් සැරසෙන්නේ නම් ඔවුන් සුරතල් කිරීම හෝ ඔවුන් සමග පයුරුපාසානමට යන්නේ නම් එය සැබැවින් ම යහපාලනය නොව නපුංසක පාලනයකි. ජනතාව ඡන්දය දුන්නේ එවැනි නපුංසක පාලන තන්ත්‍රයක් බලාපොරොත්තුවෙන් නොවේ. එහෙයින් මේ කුමන්ත්‍රණකරුවන් තව දුරටත් සුරතල් කිරිමෙන් වැළකිය යුතු ය; ඔවුන්ගේ තර්ජන ගර්ජන හමුවේ නොසැලී කටයුතු කළ යුතු ය. මහින්ද - මෛත්‍රි සාකච්ඡා යනු ‘‘ඌරන් කැකුන තලන විට හබන් කුකුළන්ට රජමගුල්’’ නොවිය යුතු ය.

ජයසිරි අලවත්ත This email address is being protected from spambots. You need JavaScript enabled to view it.