අද පාර්ලිමේන්තුවේ සාතිශය බහුතරය යනු මේ ජනතා ද්‍රෝහී තක්කඩියන්ය. රටේ ජනතාවට යහපතක් වන අණපනතක් හෝ සම්මත කර ගැනීමට මේ පාර්ලිමේන්තුවෙන් නොහැකි විය. තමන්ගේ දේශපාලන ප්‍රතිවිරුද්ධවාදීන් මර්දනයට, තමන්ගේ බඩ ගෝස්තරයට, තමන්ගේ පවුලේ දියුණුවට, බලය පවත්වාගෙන යාම විනා වෙනකක් මේතුල දකින්නට ලැබුණේ නැත.

විධායක ජනාධිපතිවරයාගේ බලතල වැඩි කිරීම වෙනුවෙන් 18 වන සංශෝධය ගෙන එමින් කළ මජර ක්‍රියාවත් වත්මන ජනාධිපතිවරයා සිය බලතල අත් හැරීම වෙනුවෙන් පැහැදිලිව පෙනී සිටින විටත් 19 වන සංශෝධනය රටේ යහපත ගැන සිතා ඒ ආකාරයෙන් ක්‍රියාත්මක කිරීමට පාර්ලිමේන්තු මන්ත්‍රීවරුන් දැක්වූ විරෝධයත් මීට ඉතා හොඳ උදාහරණයන්ය. 20 වන සංශෝධය සම්මත කර නොගෙන ඒ තමතමන්ගේ පැවැත්ම ආරක්ෂා කර ගැනීම වෙනුවෙන් බයිට් එකකට ගත්තා මිස ඒ වෙනුවෙන් කිසිදු පාර්ලිමේන්තු මන්ත්‍රීවරයකු අවංකව පෙනී සිටියේ නැත.

දැන් පාර්ලිමේන්තුව විසුරුවා හැර තිබේ.. අගෝස්තු 17 නව පාර්ලිමේන්තුව සඳහා අලුත් මහජන නියෝජිතයන් පත් කර ගැනීමට නියමිතය. ඒ නියෝජිතයන් ගොන්නට මේ හිටපු තක්කඩියන්ද ඇතුලුවීමට උපරීම බලය හැකියාව යොදනු ඇත. ජනතාවගේ කරුමෙට මේ තක්කඩියන් නැවත පාර්ලිමේන්තු පැමිණීම සිදුවීම විය හැකි නමුත් පක්ෂ පාට ජාති ආගම් බේද නොසලකා මේ තක්කඩි රොත්තම පරාජය කිරීමේ හැකියාව සිහි බුද්ධියක් ඇති ජනතාවගේ වගකීමකි. ඒ වගකීම බැ‍ඳෙන්නේ තමන්ගේ දුවා දරුවන්ගේ ඥාතියාගේ හිතවතාගේ යහපත් අනාගතය සමඟය.

මේ නිසා මෙවර මහ මැතිවරණයේදී ජාතිවාදීන් ආගම්වාදීන් දූෂිතයන් වංචාකරුවන් අපරාධකරුවන් බොරු කාරයන් සියල්ල පරාජය කර ජන සම්මත වාදී ආණ්ඩුවක් වෙනුවෙන් ඡන්දය පාවිච්චි කරමු.

- ජනතා පාක්ෂිකයා