සිවිල් සමාජ සංවිධාන විසින් මෙහෙයවන ලද ජනවාරි මැතිවරණ සටනට හය මසක් ගතවෙන්නේ ජූලි 8 වෙනිදාටය. ඊට පෙර මහින්ද ආපසු කෙළින් වන වැඩ පිළිවෙළට පාර සකසා ඇත. කවුරු මොනවා කීවත් ජනවාරි ජයග‍්‍රහණයේ සජීවි නායකයන් ඒ සටන පාවා දී නැත. ඒ වෙනුවෙන් කැපවී සිටිති. ඔවුන් කිසි විටෙක තම ජයග‍්‍රහණය කුඩු එතනෝල් කාරයන් ඉපැයූ මුදලට විකුණන්නේ නැත. ජූලි පළමුවෙනිදා මැද මුලන රැස්වීමට සුසිල් පේ‍්‍රම්ජයන්ත් ගියේ නැත. එහෙත් ඔහු විදේශයකට ගොස් ආපසු ආවේ මැද මුලනට ගියාට වඩා සතුටෙනි. පැමිණි වහා නිදිවරා කළ මෙහෙයුම රහසක් නොවේ. දැන් මහින්ද ‘මම සූදානම්‘ යයි රට පුරා පෝස්ටර් ගසා ඇත.
ශී‍්‍රලනිපය සහ සන්ධානයේ හිටපු පාර්ලිමේන්තු මන්තී‍්‍රන් සියළු දෙනාටම නාම යෝජනා දෙනවා යනු දූෂිතයන්ට නාම යෝජනා දීමකි. සචින් වාස් ජනවාරි අග මාධ්‍යට කීවේ කුමක්ද? දූෂිතයන්ට, නාම යෝජනා නොදෙයි නම් සන්ධාන මන්ත‍්‍රී කණ්ඩායමෙන් 97 දෙනෙකුට ගෙදර යන්ට වෙන බවය. සචින් වාස් ගුණවර්ධන දන්නා පරිදි සන්ධානයේ දූෂීතයන් ගණන නිවැරදි විය හැකිය. හේතුව මහින්ද ෆයිල් මා ළඟ කීවේ මේ 97 දෙනාගේ කෙළි සෙල්ලම් විස්තර ළඟ තබාගෙනය. 2014 නොවැම්බර් මැද හරියේ මෛති‍්‍ර කීවේ තවත් 30 ගණනක් එන බවය. එහෙත් ආවේ නන්දිමිත‍්‍ර ඒකනායක පමණකි. එදා දූෂණ වංචා අඩංගු ලිපිගොනුවල පිටපත් මහින්ද මැති ඇමතීන්ගේ අඹුවන්ට බෙදා හැරියේය. ඒ වැඩේ කළේ සචින් වාස් ගුණවර්ධන සහ උදය ගම්මන්පිල විසිනි. ඒ අනුව දූෂීතයන් ගණන 97 හෝ ඊට වැඩි මිස අඩු නැත.
එසේ නම් සුසිල් පේ‍්‍රම් ජයන්ත්, අනුර පි‍්‍රයදර්ශන යාපා තමන් සමග සිටි ලොරි ලෝඩ් එකටම නාම යෝජනා දෙන්නේ කෙසේද? මෛති‍්‍ර මාතරදී කී පරිදි ජනවාරි ජයග‍්‍රහණය ආපසු හරවන්නේ ද නැත.
දූෂීතයන් හිරේ යන්නේද නැත. ඔවුන් මැතිවරණ සටනට එකතු වනු ඇත. එහෙත් 20 හෝ සම්මත වුනේද නැත. මේ සම්බන්ධව චිලි රටෙන් අපට උදාහරණ ගත හැකිය. චිලියේ සැල්වදෝර් අයියන්ඩේ කථාව දන්නෝ දනිති. දූෂණයට එරෙහිව කළ සටනක් ජයගත හැකිය. ඒ ජයග‍්‍රහණ ආරක්‍ෂා කර ගැනීම ඊට වඩා වෙහෙසකරය. හේතුව යටපත් කළ හෝ පරාජය කළ දූෂීත කල්ලි ඉපයූ ධනය කිසිවෙකුට කොල්ල කෑමට නොහැකිවූ නිසාය. මෛති‍්‍රපාල සිය මැතිවරණ සටනට ලැබුන මුදල් ආධාර රජරට වකුගඩු රෝග අරමුදලට පරිත්‍යාග කරවීය. එහෙත් වකුගඩු රෝගය දෙස හැරී නොබැලූ මහින්ද රාජපක්‍ෂ සිල් රෙදි අරක්කු සහ ලිත් බෙදා හැරියේය. ජනවාරි 8 වෙනි දා අනුරාධපුර බහුතර ජනතාව පෙනී සිටියේ මහින්ද වෙනුවෙනි. ජනවාරියේදී අනුරාධපුරයේ වඩා ආකර්ශණය දිනා ගත්තේ මානව හිතවාදි මෛති‍්‍ර නොවේ.
එහෙත් බහුතර ජනතාව නිවැරදි මිනිසා තෝරා ගත්හ. යහ පාලන ආණ්ඩුව පවත්වන මහා මැතිවරණයේදීඑ ජනතාව නැවත රනිල් අගමැති කරවීමට බලා සිටිති. ඒ මෛති‍්‍රගේ අගමැති වරයා රනිල් විය යුතු බවට ජනතාව ජනවාරියේ තීරණය කළ නිසාය. ජනවාරි ජයග‍්‍රහණ භාරය රනිල් මත පැටවී ඇත. සිල් රෙදි අරක මේක බෙදලාත් දිනන්න බැරිවූ මහින්දට රනිල් පරාද කළ නොහැකිය. මහින්ද 2005 දී ප‍්‍රභාකරන් හරහා රනිල් පරාද කළ ජාතියේ වැඩකට අත ගසා ඇත. පාර්ලිමේන්තුවෙන් පිරිසක් මිලදී ගෙන අගමැති වීම අරමුණ වේ. එවිට ජනවාරි ජයග‍්‍රහණය මෛති‍්‍රට ආරක්‍ෂා කරගත හැකි වේද?
19 දියාරු කළ, 20 පරාද කළ දූෂිතයන් පළමුව රනිල්ට අත තබා දෙවනුව හැට හතර ලක්‍ෂයේ ජනමතය වළ දමනු ඇත.
-පියමුණේ-
