අමෙරිකාවේ දකුණු ෆ්ලොරීඩාහි පදිංචි 26 හැවිරිදි මැඩලින් බ්‍රොක්වේ සහ ඇගේ පෙම්වතා වූ ජේකොබ් ලැග්‍රොන් අතර පසුගියදා පැරිස් නුවරදී සිදු කළ එම විවාහ උත්සවය ‘සියවසේ විවාහය’ ලෙස නම් කර ඇතැයි විදෙස් මාධ්‍ය වාර්තා කළේය. ලොව ධනවත්ම පුද්ගලයන්, ලෝක ප්‍රකට නළුනිළියන් හා ගායක ගායිකාවන් දෙවැනි තැනට ඇද දමමින් මැඩලින් සහ ජේකොබ්ගේ අතිසුඛෝපභෝගී විවාහ මංගලෝත්සවයට ඩොලර් මිලියන 59ක් වැය කිරීම මේ දිනවල ජාත්‍යන්තර ප්‍රජාවගේ වැඩිම අවධානය දිනා ගැනීමට සමත් වී ඇතැයි ද විදෙස් මාධ්‍ය වැඩිදුරටත් වාර්තා කළේය. මනාලියගේ පියා අමෙරිකාවේ ප්‍රමුඛතම මෝටර් රථ අලෙවි සමාගමක හිමිකරුවකු වන අතර, දියණියගේ විවාහයේ සම්පූර්ණ වියදම දරා ඇත්තේ ඔහු බව ද වාර්තා වේ.
අතිඋත්කර්ෂවත් ලෙස පවත්වා ඇති මේ විවාහ මංගලෝත්සවයට පැරීසියේ පිහිටි යුරෝපයේ විශාලතම මන්දිරය වන වර්සෙයිල්ස් මන්දිරයේ පෙරහුරු රාත්‍රී සාදයක්, තරු පහේ නිවාඩු නිකේතනයක ඉස්තරම් ආකාරයේ තනිකඩ උත්සව සතියක්, මනාල යුවළගේ මිතුරු මිතුරියන්ට සුපිරි දිවා ආහාර භෝජන සංග්‍රහයක්ද ඇතුළත් වූ බව වාර්තා වේ. අනතුරුව ඔවුන්ට තවත් සුපිරි හෝටලයක රාත්‍රී නවාතැන් ද සපයා ඇත. විවාහ උත්සවයට විවිධ මිල ගණන් යටතේ සැරසිලි අයිතමයන් වෙනත් ආයිත්තම් 119ක් ඇතුළත් වූ බවත්, එහි වටිනාකම අමෙරිකානු ඩොලර් 28 සිට දසදහස දක්වා පරාසයක තිබූ බවත් වැඩිදුරටත් වාර්තා වේ. වික්ටෝරියා සම්ප්‍රදායට අනුව ආහාර වට්ටෝරු ඇතුළු විවිධ වර්ගයේ ආහාරපාන ඉහළ මිල ගණන් යටතේ සපයා තිබූ බවත්, විශාල වාදක පිරිසකගෙන් සමන්විත වාදක වෘන්දයකින් ද විවාහ මංගලෝත්සවය වර්ණවත් වූ බව වැඩිදුරටත් සඳහන් වේ.
