ඉන්දීය මූල්‍ය බුද්ධි ඒකකය මේ ප්‍රකාශය සිදු කර ඇත්තේ සුකේෂ් චන්ද්‍රසේකර්ගේ මූල්‍ය වංචාවේ ප්‍රධාන විත්තිකාරිනිය කරමින් ඇයට එරෙහිව පැවරූ නඩුව නිෂ්ප්‍රභා කරන ලෙස ඉල්ලා ඇය විසින් මහාධිකරණයට ඉදිරිපත් කළ දිව්රුම් පෙත්සම විභාගයට ගත් අවස්ථාවේදීය.
සුකේෂ් චන්ද්‍රසේකර්ගේ මූල්‍ය වංචාව සම්බන්ධ සත්‍ය තොරතුරු අද වන විට පවා හෙළි නොකිරීමට ඇය උත්සාහ ගන්නා බවත්, සුකේෂ් අත්අඩංගුවට ගැනීමෙන් පසු ඇය තම ජංගම දුරකතනයේ සියලු දත්ත මකා දැමීමට කටයුතු කර ඇති බවත් මහාධිකරණයේදී ප්‍රකාශ කර ඇති ඉන්දීය මූල්‍ය බුද්ධි ඒකකයේ නිලධාරීන් සියලු සාක්ෂි විනාශ කර දමන ලෙස ඇය සිය හිතමිතුරන්ගෙන් ද ඉල්ලීමක් කර ඇතැයි සඳහන් කර තිබේ.
එමෙන්ම ඇගේ හිටපු පෙම්වතා වන සුකේෂ් එම මුදල් වංචා සහගත ලෙස උපයා ගත් බව දැන දැනම ඔහු ලබා දුන් රුපියල් කෝටි ගණන් ඇගේ සහ ඇගේ පවුලේ සාමාජිකයන් වෙනුවෙන් වැය කර ඇතැයි ද ප්‍රකාශ කර තිබේ. තමා චන්ද්‍රසේකර්ගේ ගොදුරක් බවට පත් වූ බව මූල්‍ය බුද්ධි ඒකකයට ලබා දුන් ප්‍රකාශයේදී සඳහන් කළ ද ඒ සම්බන්ධව තොරතුරු තහවුරු කිරීමට අසමත් වූ බවද ප්‍රකාශ කර තිබේ.
සුකේෂ්ගේ නඩු විභාගයේදී ඉන්දීය මූල්‍ය බුද්ධි ඒකකය පක්ෂග්‍රාහීව කටයුතු කර ඇතැයි ද මේ වංචාවට විත්තිකාරිනියක වූ තවත් බොලිවුඩ් නිළියක වන නෝරා පටෙහි චෝදනාවෙන් නිදහස් කිරීමට කටයුතු කර ඇතැයි ද ජැකලින් වෙනුවෙන් කරුණු දැක්වූ ඇගේ නීතිඥවරුන් මහාධිකරණයට ප්‍රකාශ කර ඇතැයි ද වාර්තා වේ. ජැකලින්ගේ පෙත්සමේ වැඩිදුර විභාගය ලබන අප්‍රේල් මස 15 වැනිදාට නැවත කැඳවීමට නවදිල්ලි නුවර මහාධිකරණය තීන්දු කර ඇතැයි ද වාර්තා වේ.
-P.M
