සිරිසේන ජනාධිපතිවරයා විසින්ම පසුගිය වසරේ නිව්යෝර්ක් සංචාරයේදී එරට ශ්‍රීලාංකිකයන් සමඟ පැවැති සුහද සාකච්ඡාවකදී රණ විරු ලේබලයට මුවා වී අපරාධ සිදු කළ ආරක්ෂක අංශ සාමාජිකයන්ට එරෙහිව නීතිය ක්‍රියාත්මක කරන බවත් එය රණ විරු දඩයමක් නොවන බවටත් අවධාරණය කර තිබිණි.
මේ අතර පසුගියදා ආරක්ෂක අමාත්‍යංශ ලේකම් හේමසිරි ප්‍රනාන්දු ද මෙ කරුණ දැඩිව අවධාරණය කරමින් පවසා සිටියේ යුද්ධයට සම්බන්ධ වෙලා හිටපු ආරක්ෂක අංශ සාමාජිකයන් ගමට ඇවිත් මිනී මැරුවොත් එයා රණ විරුවෙක් නොවෙයි මිනී මරුවකු බවයි. එසේම එම මිනී මරුවන් අධිකරණයට ගෙනත් දඬුවම් ලබා දිම විය යු‍ටු බවත් ඔහු අවධාරණය කර තිබේ. වත්මන් යුධහමුදාපති මහේෂ් සේනානායකද සිටින්නෙ මෙම මිනී මරුවන්ට දඬුවම් ලබා දිය යුතුය කියන ස්ථාවරයේය.
ඒ කෙසේ නමුත් වර්තමානයේ මහින්ද රාජපක්ෂ තමන්ගේ නායකයා ලෙස පිළිගන්නා මෛත්‍රීපාල සිරිසේන දරණ ස්ථාවරය රාජපක්ෂ පාර්ශවයේ ස්ථාවරයට සපුරා වෙනස් අතර මෙය දෙපාර්ශ්වය අතර වන දේශපාලන ගැ‍ටුමකට හේතු වන කාරණයකි. මෙය රාජපක්ෂවරු රණ විරුවන් කරේ තබාගෙන යෑමේ දේශපාලන උපක්‍රමික පියවරයන් ගැනීමට එරෙහිව සිරිසේන තමන්ගේ මතය ප්‍රකාශයට පත් කිරීමක් වේ. රාජපක්ෂලාගේ සිංහල බෞද්ධ ජාතිවාදී ප්‍රවේශට එරෙහිව යමින් සිරිසේනට රාජපක්ෂලාගේ සහය ඇතිව තව දුරටත් දේශපාලනයේ රැඳීමට හැකියාවක් නැති බවත් පැහැදිලි කාරනාවක් වේ. එජාපය සමඟ වන ඇයි හොඳැයිය මුලුමනින්ම පළුදු කරගෙන සිටින සිරිසේන මේ අලුතෙන් නටන්න යන නාඩගම පැහැදිලි නැත.
රණ විරු දඬයමට එරෙහිව පසුගිය කාලයේ ගෝඨාභය රාජපක්ෂ ඇතුලුව චෝදනා ලත් ආරක්ෂක අංශ සාමාජිකයන් නීතියේ රැහැන්ට කො‍ටු කිරීමට එරෙහිව සිරිසේන විමර්ශන අංශවලට බලපෑම් කළ බවද රහසක් නොවේ.
