ගෝඨාභය රාජපක්ෂ මහතා විසින් ඉදිරිපත් කර ඇති අභියාචනා පෙත්සමක් සළකා බැලීමෙන් අනතුරුව බුවනෙක අලුවිහාරේ, ගාමිණී අමරසේකර සහ එස්. තුරෙයිරාජා යන මහත්වරුන්ගෙන් සමන්විත විනිසුරු මඬුල්ලක් විසින් මෙම නියෝගය සිදුකර ඇත.
පෙත්සම්කාර ගෝඨාභය රාජපක්ෂ මහතා පවසා සිටින්නේ ඩී. ඒ .රාජපක්ෂ අනුස්මරණ කෞතුකාගාරය ඉදිකිරීමේදී රුපියල් මිලියන තිස් හතරකට ආසන්න රජයේ මුදල් සාවද්‍ය ලෙස පරිහරණය කළේ යැයි චෝදනා කරමින් තමා ඇතුළු විත්තිකරුවන් පිරිසකට එරෙහිව නීතිපතිවරයා කොළඹ ත්‍රිපුද්ගල විශේෂ මහාධිකරණය හමුවේ නඩුවක් ගොනු කර ඇති බවයි. නමුත් කොළඹ ත්‍රිපුද්ගල විශේෂ මහාධිකරණයට බලය ලබාදී ඇත්තේ බරපතල ආර්ථික චෝදනා සහ මූල්‍ය අපරාධ ආදී කරුණු සඳහා නඩු විභාග කිරීමට බවත් ඉහත සිදුවීමට අදාල නඩුව විභාග කිරීමට ත්‍රිපුද්ගල මහාධිකරණයට බලයක් නොමැති බවත් ගෝඨාභය රාජපක්ෂ මහතා පවසා සිටියි. ඒ අනුව තම නීතීඥවරු විරෝධතාවක් මතු කළ ද එම විරෝධතාව නොතකා විශේෂ මහාධිකරණයේ නඩුව විභාගයට ගැනීමට තීරණය කර ඇති බවත් එම තීරණයට එරෙහිව ශ්‍රේෂ්ඨාධිකරණය වෙත අභියාචනයක් ඉදිරිපත් කිරීමට ඊට අදාල ගොනු විශේෂ මහාධිකරණය වෙත භාර දෙනු ලැබූවද එය ශ්‍රේෂ්ඨාධිකරණය වෙත යොමු කිරීමට විශේෂ මහාධිකරණය ප්‍රතික්ෂේප කළ බවත් ගෝඨාභය රාජපක්ෂ මහතා පවසයි.
එලෙස තම අභියාචනය ශ්‍රේෂ්ඨාධිකරණය වෙත යොමු කිරීම ප්‍රතික්ෂේප කිරීමට ත්‍රිපුද්ගල මහාධිකරණ විනිසුරු මඩුල්ල ගත් තීන්දුව නීති විරෝධී බවට තීන්දුවක් ලබාදෙන ලෙසත් මෙම පෙත්සම විභාග කොට අවසන් තීන්දුවක් ලබාදෙන තෙක් කොළඹ ත්‍රිපුද්ගල මහාධිකරණ විනිසුරු මඩුල්ල හමුවේ තමන්ට එරෙහිව පවතින නඩුව විභාගය කිරීම අතුරු නියෝගයක් නිකුත් කරන මෙන් ද ගෝඨාභය රාජපක්ෂ මහතා ඉල්ලා ඇත.
පෙත්සමට අදාල කරුණු සළකාබැලීමෙන් පසු එය විභාගයට ගැනීම සඳහා ත්‍රිපුද්ගල විනිසුරු මඬුල්ල අවසර ලබාදුන් අතර එය ඔක්තෝබර් මස 01 වැනිදා විභාගයට ගැනීමටත් විශේෂ මහාධිකරණය හමුවේ පැවැත්වෙන සිද්ධියට අදාල සාක්ෂි විභාගයට ගැනීමේ කටයුතු අත්හිටුවන ලෙසත් නියෝග කර ඇත.
(lankatruth)
