මෙම අවස්තාවට සහභාගි වන ලෙස පොදුජන පෙරමුණ ලේකම්වරයා විසින් ඒකාබද්ධ විපක්ෂයේ අනෙකුත් පැරණි සාමාජික පක්ෂ නායකයන් ට ආරාධනා කර තිබේ. නමුත් මේ පිළිබඳව අද සවස රැස් වී සාකච්ඡා කර ඇති ඒකාබද්ධ විපක්ෂයේ පක්ෂ නායකයන් හෙට පැවැත්වෙන පොහොට්ටුව හා කුඩා පක්ෂ අතර ගිවිසුම් ගත වීමේ අවස්ථාවට සහභාගිවීමෙන් වැලකී සිටීමට තීරණය කර තිබේ. එයට හේතුව ලෙස එකී පක්ෂ නායකයන් පවසන්නේ සියලු පක්ෂ ඒකරාශි කර පුළුල් සන්ධානයක් ගොඩනැගීම මඟ හැර පොදුජන පෙරමුණ තනි තනි පක්ෂ සමඟ වෙන වෙනම ගිවිසුම් ගතවීම තමන් ප්‍රතික්ෂේප කරන බවයි.
ඒ අනුව මහජන එක්සත් පෙරමුණ , ජාතික නිදහස් පෙරමුණ , ලංකා සමසමාජ පක්ෂය , පිවිතුරු හෙළ උරුමය, ශ්‍රී ලංකාවේ කොමියුනිස්ට් පක්ෂය ,ශ්‍රී ලංකා මහජන පක්ෂය ,ප්‍රජාතන්ත්‍රවාදී වාමාංශික පෙරමුණ ඇතුලු පක්ෂ ගණනාවක් මෙකී වර්ජනය සිදු කරනු ඇත. මීට අමතරව හිටපු අමාත්‍ය ඒ එල් එම් අතාවුල්ලා සහ ප්‍රභා ගනේෂන් මහතුන්ගේ පක්ෂ ද මෙම අවස්තාවට සහභාගි නොවී සිටීමට තීරණය කර තිබේ.
මේ තත්වය මත හෙට දිනයේදී ගිවිසුම්ගත වීම අත්හි‍ටුවීමට හෝ පොදු ගිවිසුමකට මෙම කුඩා කණ්ඩායම් එකඟකර ගැනීමට හෝ සිදු වෙනු ඇතැයි එම පාර්ශ්වයේ ආරංචි මාර්ග සඳහන් කරයි
