කෙසේ වෙතත මෙම කසල ලංකාවට ගෙන ඒමට හේතුව කුමක් ද? යන්න පිළිබඳව මාධ්‍ය වාර්තා කළ ආකරයට රටේ විශාල කැළඹීමක් සිදු වී තිබෙනවා. ඇත්තෙන්ම රටේ තිබෙන කසලවලට අමතරව තවත් කසල ගෙන්වන්නේ කුමක් අරඹයාද ? මධ්‍යාවල සඳහන් වූ ආකාරයට ඉදිරියේ දී රට කසලවලින් යට වීමට නියමිතය.
නමුත් මෙය කසල ප්‍රතිචක්‍රීකරණය කිරීම සඳහා වූ කසල කළමණාකරණ ව්‍යාපෘතියකි. ලංකාවේ මෙම ක්‍රියාවලිය පිළිබඳ බොහෝ දෙනෙකුට අත් දැකීම් අඩු වුව ද ලෝකයේ මෙවැනි ව්‍යාපෘති මහා පරිමාණයෙන් සිදු වන අතර එයින් විශාල ආදායමක් උපයා ගනු ලබයි. යුරෝපයෙ ඇතැම් රටවල් විසින් බැහැර කරනු ලබන කැලිකසළ සිය රට වෙත ගෙන ගොස් බල ශක්තිය බවට පරිවර්තනය කරන අවස්ථා පවති. උදාහරණ ලෙස රෝමයේ නිවාසවලින් බැහැර කරනු ලබන අපද්‍රව්‍ය ටොන් 70,000 ක් ඉවත් කිරීම සඳහා ඉතාලිය, EVN නමැති ඕස්ට්‍රියානු සමාගමට මුදල් ගෙවනු ලබයි.
ඒ අනුව ඇති කර ගත් ගිවිසුමකට අනුව මේ වසරේ ඇල්ප්ස් කඳු වැටිය ඔස්සේ උතුරු දිග ඉතාලිය හරහා දුම්රිය මාර්ගයෙන් ප්‍රවාහනය කෙරෙන අපද්‍රව්‍යවල අවසන් නැවතුම EVN ආයතනයට අයත් ඕස්ට්‍රියාවේ තාප කසළ බලාගාරයකි. සතියකට තුන් වරක්වත් දුම්රිය ඔස්සේ කසළ ප්‍රවාහනය කෙරෙන අතර එක් දුම්රියක් තුළ ආසන්න වශයෙන් අපද්‍රව්‍ය ටොන් 700 ක්වත් අඩංගු වේ. එලෙස ප්‍රවාහනය කෙරෙන කැලිකසළ පුළුස්සනු ලබන අතර එමගින් වාෂ්ප උත්පාදනය කරනු ලබයි. එම වාෂ්ප අසල්වැසි බලාගාර වෙත යවනු ලබන අතර ඒවා විදුලි බලය බවට පරිවර්තනය කෙරෙයි. ඉන් ඕස්ට්‍රියාවේ ලෝවර් පළාතේ නිවාස එක්ලක්ෂ හැත්තෑ දහසකට විදුලිය ලබා දෙයි.
ලංකාවේද බොහෝ දෙනාට ගැටළුවක් වූ මෙම කසල ආනයනයේ සුල මුල ද මෙයට සමානය. නමුත් ලංකාවේ මාධ්‍ය ආයතන හා මාධ්‍ය කරුවන්ගේ ගවේශනයෙන් තොර වූ මාධ්‍යකරණය නිසාවෙන් සාමාන්‍ය මහ ජනයා අතර මිත්‍යාව හා අසත්‍ය ඉතා සීග්‍රයෙන් වර්ධනය වීම කණගාටුවට කරුණකි.
විශේෂයෙන් වාණිජ අරමුණු අපේක්ෂාවෙන් අන්තර්ගතය, විශ්වාසනීයත්වය හෝ සමබරතාව නොසලකා පුවත් මැවීමේ තරඟයක සිටින මාධ්‍යකරුවන් සිදු කරනු ලබන ඇතැම් වාර්තාකරණයන් තුළින් රටට වන හානිය අතිමහත්ය. ඇතැම් විට විදෙස් ආයොජකයින් පවා මෙවැනි තත්ත්වයන් හමුවේ සිය ආයෝජනයන් සදහා මුදල් වෙන් කිරීම හෝ ව්‍යාපෘති සඳහා මැලිකමක් දැක්වීමට ද ඉඩකඩ පවතියි. මන්දයත් ලංකාවට අමතරව ආසියාවේ තවත් බොහෝ රටටවල් මෙවැනි ව්‍යාපෘති භාර ගැනීමට ඔනෑතරම් ඇත.
ලංකාවේ මාධය සදාචාරය තුළ සංවර්ධන පුවත් වාර්ථාකරණයේ අඩුපාඩු ඇත. නමුත් එසේ ගවේශනාත්මක වාර්ථාකරණයේ යෙදීමට නොහැකි නම් අසත්‍ය පුවත් මැවීමෙන් වැලකී සිටීමට මාධ්‍යකරුවන් වගබලා ගත යුතුය.
