පසුගිය කාලයේදී මෙම පක්ෂ දෙකෙහි නියෝජිතයන් කළ සාකච්ඡාවලදී ජනාධිපතිවරණය සම්බන්ධයෙන් පමණක් නොව ආණ්ඩුව බලය අත්පත් කර ගැනීම ඇමැතිකම් බෙදා හදා ගැනීම ගැනද සාකච්ඡා කර තිබේ. 19 වන ව්‍යවස්ථාව අනුව ජාතික අණ්ඩුවක් ගොඩනගන්නෙ නම් පමණක් ඇමැති මණ්ඩලය 45 දක්වා වැඩි කර ගැනීමේ හැකියාව ඇත. එහෙත් ඒ සඳහා බහුතර බලය හිමි පක්ෂය සමඟ අනෙක් කණ්ඩායම් පක්ෂ ලෙස එකතු විය යුතුය. පෙර යුගයේදී මෙන් තනි තනිව මන්ත්‍රීවරුන් බිලි බා ගැනීමට තිබෙන ඉඩ කඩ ඉන් ඇහිරි තිබේ.
විශේෂයෙන්ම පොදු ජන පෙරමුණ මේ උත්සහ ගන්නේ එළඹෙන ජනාධිපතිවරණයෙන් පසුව පාර්ලිමේන්තුවේ ඔළුගෙඩි එහාට මෙහාට කර නව ආණ්ඩුවක් පිහිටුවා ගැනීමට තිබෙන උවමනාව නිසාය. තමන්ගේ අපේක්ෂකයා වන නන්දසේන ගෝඨාබය ජයගත්තා හෝ නොගත්තා තම පාර්ශ්වයේ ආණ්ඩුවක් පිහිටුවා ගැනීම කටයුතුකර මහ මැතිවරණයකට යෑම ඔවුන්ගේ අපේක්ෂාවය. තමන්ට පාර්ලිමේන්තු බහුතරය නොමැති නිසා අනෙක් පාර්ශවල මන්ත්‍රීවරුන්ට ඇමැති වරප්‍රසාද සහ වෙනත් වරදාන ලබා දී එම පිරිස් එකතු කරගෙන තනි ආණ්ඩුවක් සැකසීම ඔවුන් සිදුකළ යුතුය. එම යෝජනාවට ශ්‍රීලනිපයේද එකඟතාවය හිමි වීමි ව ඇතැයි පැවැසේ. ඒ වෙනුවෙන් ව්‍යවස්ථා සංශෝධන යෝජනාවක් පාර්ලිමේන්තුවට ඉදිරිපත් කර ආණ්ඩුවට එක්වීමට කැමැති එජාපය සහ අනෙකුත් පක්ෂවල මන්ත්‍රීවරුන්ගේද සහයෝගය මත 19 වන ව්‍යවස්ථාව වෙනස් කර ගැනීමට හැකි වෙනු ඇතැයි පොදුජන පෙරමුණ විශ්වාසය පල කරයි.
