ඒ අනුව විධායක ජනාධිපතිධුරය අහෝසි කිරීම සඳහා පසුගිය කාලයේ පෙළ ගැසුනු ජනතා විමුක්ති පෙරමුණ , දෙමළ සංධානය සහ ශ්‍රීලනීපය ද එම මහතාට සහයොගය දෙනු ඇතැයි අපේක්ෂා කරයි. එහෙත් මෙහිදී වැදගත්ම කාරණාව වන්නේ අගමැතිධුරය දරන රනිල් වික්‍රමසිංහගේ එම ධුරයත් පක්ෂ නායකත්වයත් වෙනස් නොකිරීමට කරූ ජයසූරිය එකඟ විය යුතු වීමයි. එසේම නියෝජ්‍ය නායක සජිත් ප්‍රේමදාසගේ තනතුරටද හානියක් නොවිය යුතු වෙයි.

කෙසේ නමුත් විධායක ජනාධිපතිධුරය අහෝසි කරනවා යැයි කියමින් 1994 වසරේ සිටම ජනාධිපතිධුරයට පත් කිසිවකුත් එය අහොසි කළේ නැත. පසුගිය ජනාධිපතිවරණයට පෙර 2014 වසරේදී එජාපයද සිය ජාතික සමුලුවේදී එය අහෝසි කරන බවට යෝජනාවක් සම්මත කර ගත්තද එය සිදු වූයේ නැත. මේ නිසා විධායකය අහෝසි කරනවා යැයි කියමින් ගෙනෙන සටන් පාඨය ජනාධිපතිවරණය දිනා ගැනීම සඳහා වන තවත් රැවැටිලිකාර සටන් පාඨයක් පමණක් විය හැකිය.

පසුගිය මාසයේදී විධායක ජනාධිපතිධුරය අහෝසි කිරීම සඳහා අගමැතිවරයා ජනාධිපතිවරයාට යෝජන කර තිබිණි. එහිදී විපක්ෂ නායක මහින්ද රාජපක්ෂගෙන් කළ විමසීමේදී ඔහු ඊට එක හෙළාම විරුද්ධ වී තිබිණි.

මෙ අතර ඊයේ සජිත් ප්‍රේමදාස සිය ජනාධිපති අපේක්ෂකත්වය වෙනුවෙන් සෙසු පක්ෂවල එකඟතාවය ලබා ගැනීම සඳහා ඇමැති මංගල සමරවීරගේ නිවසේ පැවැති සාකච්ඡාව සාර්ථකව අවසන්ව තිබේ. එහිදී එම පක්ෂ නායකයන් එජාප අපේක්ෂකයා ලෙස සජිත් ප්‍රෙමදාසගේ ඉදිරිපත් වීම පිළිගෙන ඇත..

කෙසේ නමුත් අද දිනයේදී අගමැතිවරයා සමඟ වන සාකච්ඡාවලින් අනතුරුව එජාප අපේක්ෂකය කවුද යන්න නිශ්චිතව තීන්දු කෙරෙනු ඇති බවත් එජාප පක්ෂ ආරංචි මාර්ග පවසයි.