ජනපති එවැනි නායකයකු නොවන බව කීමට කිසිවකුට නොහැකි බවද උන්වහන්සේ කීහ.

මධ්‍යම සංස්කෘතික අරමුදල මගින් ජනපති උපදෙස් මත රුපියල් ලක්ෂ 70ක මුදලක් වැයකර ප්‍රතිසංස්කරණය කරන ලද මහනුවර පැරණිතම විහාරය වන උඩවත්තේකැලේ රාම විහාරයේ සංඝාවාසය හා විහාර ගෙය සඝසතු කොට පූජා කිරීමේ උත්සවයේ දී අස්ගිරි මහනාහිමියෝ මේ බව ප්‍රකාශ කළහ.

ජනපති මහින්ද රාජපක්ෂ මහතා විසින් විහාර මන්දිරය සහ සංඝාවාසය සඝසතු කොට පූජා කරනු ලැබීය.

මෙහිදී අස්ගිරි මහනාහිමියෝ වැඩිදුරටත් කතා කරමින් රට සංවර්ධනය කැර ගොඩනැගීමේ උනන්දුව හා කැපවීම ජනපතිතුමා තුළ තිබුණත් මැති ඇමැතිවරුන්ගේ හා රාජ්‍ය නිලධාරීන්ගේ සහය නොමැතිව තනිව එය එතුමාට කළ නොහැකි බවත් පැවසූහ.

ජනපති පවරන වැඩකොටස් වගකිවයුත්තන් නිසි පරිදි ඉටු නොකළහොත් එය රටටත් ජනතාවටත් සිදුකරන හානියක් බවත් තනතුරු දරමින් වැඩ නොකර වැටුප් ගන්නා උදවිය තමන් මේ බුක්ති විඳින්නේ මහජන මුදල් බව සිහියේ තබා ගත යුතු බවත් මහනාහිමියෝ කීහ.

තමන් ගන්නා වැටුපට ණයකාරයින් වෙන්න එපා කියා මා ඔවුනට පවසනවා යැයිද උන්වහන්සේ පැවසූහ.

අද ඇතැම් නිලධාරින් තම වගකීම් පැහැර හැර ක්‍රියා කිරීම නිසා අගෞරවයට ලක්වන්නේ රාජ්‍ය නායකයා බවත් ගන්නා වැටුපට වැඩක් නොකරන උදවියට මෙළොවදී පමණක් නොව පරළොවදී ද විපාක විඳින්නට සිදුවන බවත් මහනාහිමියෝ අවධාරණය කළහ.

ස්වාභාවික විපත් පාලනය කිරීමේ හැකියාවක් රජයට නොමැති බවත් නියඟයෙන් පීඩා විඳින ප්‍රදේශවල ජනතාවට සහන සැලසීමට අප හැමෝම එක්විය යුතු බවත් මෙහිදී මහනාහිමියෝ ප්‍රකාශ කළහ.

මෙහිදී රාම විහාරයේ විහාරාධිපති අම්පිටියේ ධම්මසිද්ධි හිමියෝ පිළිගැනීමේ කතාව සිදුකළ අතර සංස්කෘතික හා කලා කටයුතු ඇමැති ටී. බී. ඒකනායක, මධ්‍යම පළාත් ආණ්ඩුකාර ටිකිරි කොබ්බෑකඩුව, ප්‍රධාන ඇමති සරත් ඒකනායක, මධ්‍යම පළාත් සභාවේ සභාපති මහින්ද අබේකෝන් යන මහත්වරු මෙම අවස්ථාවට සහභාගි වූහ.

(අසේල කුරුළුවංශ හා ඉන්දික පොල්කොටුව)