මරණ දඬුවම ක්‍රියාත්මක කිරීම අත්හිටුවමින් ශ්‍රේෂ්ඨාධිකරණය විසින් පනවා තිබූ අතුරු තහනම් නියෝගයද ලබන සැප්තැම්බර් 07 දක්වා දීර්ඝ කෙරිණ. මරණ දඬුවම යළි ක්‍රියාත්මක කිරීමට එරෙහිව පෙත්සම් 12 ක් ශ්‍රේෂ්ඨාධිකරණයට ගොනුකර ඇත.

බන්ධනාගාර කොමසාරිස් ජනරාල්, වැලිකඩ බන්ධනාගාර අධිකාරී, අධිකරණ ඇමැති, නීතිපති පෙත්සමේ වගඋත්තරකරුවන් ලෙස මුලින් නම්කර තිබූ අතර පසුව හිටපු ජනාධිපති මෛත්‍රීපාල සිරිසේනද වග උත්තරකරුවකු කරන ලදී.

මත්කුඩු සන්තකයේ තබාගැනීම හා ජාවාරම් කිරීම් වැරදිවලට මරණ දඬුවම නියම වූ සිව් දෙනකු එල්ලා මරා දැමීමට අනුමැතිය ලබාදෙන ලියකියවිලිවලට තමා අත්සන් කළ බවත්, එල්ලා මරණ දිනයන්ද තීරණය කර ඇති බවත් ජනාධිපති මෛත්‍රිපාල සිරිසේන මාධ්‍ය ආයතන ප්‍රධානීන් සමග පැවැත් වූ සාකච්ඡාවකදී 2019 වසරේදී ප්‍රකාශ කරන ලදී.

මරණ දඬුවම ක්‍රියාත්මක කිරීමට එරෙහිව ශ්‍රේෂ්ඨාධිකරණයට පෙත්සම් ගොනු කළේ ඉන් අනතුරුවයි.

පෙත්සම් බොහෝමයක සඳහන් කර ඇත්තේ වරදක් කළ තැනැත්තකු මිය යන තෙක් බෙල්ලෙන් එල්ලා තැබීම ශිෂ්ට සමාජයකට නොහොබිනා ම්ලේච්ඡ ක්‍රියාවක් බවත් ජනාධිපතිවරයා ගත් හිතුවක්කාරී තීරණය ආණ්ඩුක්‍රම ව්‍යවස්ථාවට පටහැනි බවත්, ඉන් 12(1), 112, 13(4) යන වගන්තිවලින් පිළිගෙන ඇති ජනතාවගේ මූලික අයිතිවාසිකම් උල්ලංඝනය කිරීමක් යැයි පෙත්සම්වල සඳහන් කර ඇත.

-පංචාලි අබේසේකර