ශ්‍රී ලංකාවට එරෙහිව ඉදිරිපත්වන යෝජනා ඇතුළත් වාර්තාව හා ඒ සම්බන්ධයෙන් ගත යුතු ඉදිරි ක්‍රියාමාර්ග පිළිබඳව ගරුතර මහා සංඝරත්නයේ අවවාද හා උපදෙස් ලබා ගැනීමේ අරමුණින් මෙම සාකච්ඡාව පැවැත්වී ඇත.
කොවිඩ්-19 වසංගත තත්ත්වය සාර්ථකව මර්දනය කළ රටවල් අතර ශ්‍රී ලංකාව ලොව ඉදිරියෙන්ම සිටිය දී, අප රට අපකීර්තියට පත් කිරීමේ අරමුණින් වැරදි මතවාද ඇතුළත් කොට ඉතා ප්‍රෝඩාකාරී ලෙස මෙම මානව හිමිකම් යෝජනාවලිය නිර්මාණය කර ඇති බව එහිදී විදේශ අමාත්‍ය දිනේෂ් ගුණවර්ධන සඳහන් කර ඇත.
රටේ ජයග්‍රහණයට මෙන් ම ස්වෛරීත්වයට හානි වන ආකාරයේ කරුණු 16ක් ඇතුළත් කරමින් ජගත් මානව හිමිකම් මහ කොමසාරිස්වරිය මෙම යෝජනා වාර්තාව ඉදිරිපත් කර ඇති බව එහිදී දී හෙළි විය.
මේ සම්බන්ධයෙන් අදහස් දක්වමින් පූජ්‍ය මහාචාර්ය මැදගොඩ අභයතිස්ස හිමියන් ප්‍රකාශ කර සිටියේ මෙවැනි තීරණාත්මක අවස්ථාවක ගරුතර මහා සංඝරත්නයේ අවවාද හා අනුශාසනා ලබා ගැනීමට තීරණය කිරීම සම්බන්ධයෙන් ප්‍රථමයෙන් අග්‍රාමාත්‍යවරයා ඇතුළු ආණ්ඩුවට ස්තූතිවන්ත වන බව ය. මෙවැනි අවස්ථාවක ජිනීවා මානව හිමිකම් කොමිසමට ප්‍රති-යෝජනාවක් ඉදිරිපත් කිරීම නුසුදුසු බවත්, ඒ වෙනුවට අපගේ නිවැරදි භාවය සඳහන් කරමින් විත්ති වාචකයක් පමණක් ඉදිරිපත් කළ යුතු බව උන්වහන්සේ පැවසූහ.
මානව හිමිකම් කොමිසමේ අරමුණ රට බෙදා වෙන්කිරීම බව පෙන්වා දුන් මහාචාර්ය මැදගොඩ අභයතිස්ස හිමියෝ මානුෂීය මෙහෙයුමකින් ත්‍රස්තවාදය අවසන් කිරීම යුද අපරාධයක් යැයි කීම මහා අපරාධයක් බව පෙන්වා දුන්හ. මෙම යෝජනාවලට අදාළව ප්‍රතිසන්ධානය ඉතා භයානක බවත් එවැනි එකඟවීමකින් තොරව කාලය ගෙන පාර්ලිමේන්තුවේ දේශප්‍රේමී පනතක් සම්මත කර ගැනීම උචිත බව ද එහිමියන් පවසා සිටියහ.
මෙම තත්ත්වයට මුහුණ දීමට බෞද්ධ රටවලට අපගේ ස්වාමීන් වහන්සේලා මාර්ගයෙන් යම් බලපෑමක් කළ හැකි බවත්, ඒ ඔස්සේ සාධනීය ප්‍රතිඵලයක් ලබාගත හැකි වනු ඇති බවත් උන්වහන්සේ වැඩි දුරටත් පැවසූහ.
ගරුතර මහා සංඝරත්නයේ අවවාද හා අනුශාසනා පිළිබඳව ස්තූතිවන්ත වූ අග්‍රාමාත්‍යවරයා රට මුහුණ දෙන ඕනෑ ම අභියෝගයක් හමුවේ මහා සංඝරත්නයේ අවවාද හා අනුශාසනා සඳහා ප්‍රමුඛස්ථානය ලබා දෙන බවත් හා ඒ අනුව ක්‍රියා කරන බවත් සඳහන් කර තිබේ.
-පංචාලි අබේසේකර
