රජයේ වෛද්‍ය නිලධාරින්ගේ සංගමය සමඟ අරලියගහ මන්දිරයේ පැවැති සාකච්ඡාව අතරතුර එම සංගමයේ සභාපති විශේෂඥ වෛද්‍ය අනුරුද්ධ පාදෙණිය කළ ඉල්ලීමකට අග්‍රාමාත්‍යවරයා මෙලෙස එකඟත්වය පළ කර තිබේ.
සෞඛ්‍ය සේවය සහ වෛද්‍යවරුන් හමුවේ පවතින ගැටලු හා එම ගැටලු විසඳා ගැනීමට රජයේ වෛද්‍ය නිලධාරීන්ගේ සංගමය ඉදිරිපත් කරන යෝජනා මෙම හමුවේ දී සාකච්ඡාවට ගැණිනි.
රජයේ වෛද්‍ය පීඨයකින් මේ වන විට බිහිවන වෛද්‍යවරුන්ගේ වයස් සීමාව බොහෝවිට අවුරුදු 28 හෝ 30කට ආසන්න වන බව විශේෂඥ වෛද්‍ය අනුරුද්ධ පාදෙණිය පෙන්වා දී ඇත.
මේ පිළිබඳව වූ යෝජනා සලකා බලා රජයේ වෛද්‍ය පීඨයකින් බිහිවන වෛද්‍යවරයෙකුගේ වයස් සීමාව අවුරුදු 22 හෝ 23 දක්වා අඩුකර ගැනීමට අධ්‍යාපන අමාත්‍යංශය හා ඒකාබද්ධව වැඩපිළිවෙළක් සකස් කරන්නැයි එහිදී අග්‍රාමාත්‍යවරයා බලධාරීන්ට දැනුම් දී තිබේ.
අධ්‍යාපන අමාත්‍යංශයේ ලේකම් මහාචාර්ය කපිල පෙරේරා අදහස් පළ කරමින් සාමාන්‍ය පෙළ විභාගය අගෝස්තු මාසයේදීත් උසස් පෙළ විභාගය දෙසැම්බර් මාසයේදීත් පැවැත්වීම සඳහා වන නව යෝජනාවක් අමාත්‍ය මණ්ඩල අනුමැතියට ලබන සතියේ යොමු කරන බව කියා සිටියේ ය. ඒ අනුව දරුවන්ගේ අධ්‍යාපනයට වැඩිපුර ගත වූ මාස 9ක කාලයක් අඩුකර ගැනීමට අපේක්ෂා කරන බව හෙතම පැවසී ය.
විශේෂඥ වෛද්‍යවරුන්ට අමතරව සියලු ම වෛද්‍යවරුන්ගේ විශ්‍රාම වයස අවුරුදු 62/63 දක්වා දීර්ඝ කිරීම පිළිබඳව ද එහිදී අග්‍රාමාත්‍යවරයාගේ අවධානය යොමු විය. ඒ අනුව ඉදිරියේ දී අවශ්‍ය සංශෝධන සඳහා සාකච්ඡා මාර්ගයෙන් ක්‍රියාමාර්ග ගැනීමට නියමිතයි.
-පංචාලි අබේසේකර
