එම ගැසට් පත්‍රය ජනාධිපති ගෝඨාභය රාජපක්ෂ මහතාගේ අත්සනින් යුතුවයි ප්‍රකාශයට පත් කර ඇත්තේ.
ඒ අනුව අන්තවාදී චෝදනා සම්බන්ධයෙන් සැකපිට අත් අඩංගුවට ගන්නා හෝ භාර වන පුද්ගලයින් පැය 24ක් තුළ ආසන්නතම පොලිස් ස්ථානයේ ස්ථානාධිපතිවරයා වෙත භාරදිය යුතු වනවා. ඉන් අනතුරුව සැකපිට අත්අඩංගුවට ගත් අය තවදුරටත් හෝ රඳවා තබාගත යුතු ද යන්න සම්බන්ධයෙන් පොලිස් ස්ථානාධිපතිවරයා විසින් විෂය භාර අමාත්‍යවරයා වෙත වාර්තාවක් ඉදිරිපත් කළ යුතු බවයි ගැසට් නිවේදනයේ සඳහන් වන්නේ. අදාළ සැකකරු විසින් නිශ්චිත වරද සිදුකර ඇත්නම් නීති පියවර ගැනීම සඳහා එම කරුණ නීතිපතිවරයා වෙත යොමු කළ යුතු වනවා.
නීතිපතිවරයා විසින් අදාළ වරදේ ස්වභාවය මත එම පුද්ගලයාට එරෙහිව නඩු පැවරීමට විකල්පයක් වශයෙන් පුනරුත්ථාපන මධ්‍යස්ථානයකට යොමු කිරීම සුදුසු යැයි නිගමනය කළහොත් නීතිපතිවරයාගේ ලිඛිත අනුමැතිය සමග අදාළ පුද්ගලයා මහේස්ත්‍රාත්වරයෙකු හමුවට ඉදිරිපත් කළ යුතුයි.
වසරකට නොවැඩි කාලයක් පුනුරුත්ථාපනය සඳහා මධ්‍යස්ථානයක් වෙත යොමු කිරීමට මහෙස්ත්‍රාත්වරයාට නියෝග කළ හැකි බව අතිවිශේෂ ගැසට් නිවේදනයේ දැක්වෙනවා. තවද පුනරුත්ථාපන කාලය වරකට මාස 06ක් සඳහා දීර්ඝ කළ හැකියි. ඒ දීර්ඝ කිරීම්වල මුළු කාල පරිච්ඡේදය තවදුරටත් වූ මාස දොළහක් නොඉක්මවිය යුතු අතර ඒ එක් එක් දීර්ඝ කිරීම පුනරුත්ථාපන කොමසාරිස් ජනරාල්වරයාගේ නිර්දේශය මත කළ යුතු වනවා.
-ITN
