සමෘද්ධි, ගෘහ ආර්ථික, ක්ෂුද්‍ර මුල්‍ය ස්වයං රැකියා හා ව්‍යාපාර සංවර්ධන රාජ්‍ය අමාත්‍යාංශයේ ඉදිරි සංවර්ධන වැඩසටහන් පිළිබඳව මුදල් අමාත්‍යාංශ රන්දොර ශ්‍රවණාගාරයේ පැවැති විශේෂ සාකච්ඡාවට එක්වෙමින් අග්‍රාමාත්‍යවරයා මේ බව ප්‍රකාශ කර ඇත.
මේම අවස්ථාවට සම්බන්ධ වූ රාජ්‍ය අමාත්‍ය ෂෙහාන් සේමසිංහ මෙම විශේෂ හමුවේ අරමුණ සහ ඉදිරි සංවර්ධන වැඩසටහන් පිළිබඳව පැහැදිලි කර ඇත.
මේ වන විටත් සමෘද්ධි සහනාධාර ලබන නමුත් තව දුරටත් එම සහනාධාර අවශ්‍ය නොවන පිරිස් සමෘද්ධි සහනාධාර වැඩසටහනින් ඉවත් කිරීම සඳහා මෙතෙක් ක්‍රමවත් වැඩපිළිවෙළක් සකසා නොමැත. එහෙයින් සමෘද්ධිලාභීන් සිය කැමැත්තෙන් ඉවත්ව යෑමේ දී 4%ක සහන පොලී අනුපාතය යටතේ රුපියල් ලක්ෂ 5ක ණයක් ලබා දීම ඉදිරියටත් ක්‍රියාත්මක කිරීමට මෙහි දී තීරණය විය.
දිවයින පුරා පවුල් 1762655 සමෘද්ධි සහනාධාරය ලබන අතර ඒ වෙනුවෙන් රජය වාර්ෂිකව රුපියල් මිලියන 53000ක් වැය කරයි. මෙයට අමතරව සමෘද්ධි කාන්තා ව්‍යවසායකයින් 25000 ක් සවිබල ගැන්වීමේ වැඩසටහන ග්‍රාම සේවා වසම් 14000ක ක්‍රියාත්මක වේ. මේ වසර අවසන් වන විට නිෂ්පාදන ගම්මාන 500ක් රට පුරා බිහි කිරීමේ වැඩසටහන යටතේ ගම්මාන 50ක කටයුතු මේ වන විට ආරම්භ කර ඇත.
ආබාධිත පිරිස් හඳුනා ගනිමින් ඔවුන් ආර්ථික වශයෙන් ශක්තිමත් කිරීමට හා තැලසීමියා රෝගයෙන් පෙළෙන ජනතාවට යම් සහනයක් ලබා දෙන ලෙස ද අග්‍රාමාත්‍යවරයා අමාත්‍යාංශ නිලධාරීන්ට උපදෙස් දී තිබේ.
ජනාධිපති කාර්යය සාධක බලකාය මගින් සියලු අමාත්‍යංශ හා ඒකාබද්ධව සමෘද්ධිලාභීන් සහ පොරොත්තු ලේඛනවල සිටින අඩු ආදායම්ලාභීන් සවිබල ගැන්වීමට අවශ්‍ය කටයුතු විධිමත් කිරීම පිළිබඳව ද මෙහි දී අගමැතිගේ අවධානය යොමු විය.
-පංචාලි අබේසේකර
