මෙම ව්‍යාපෘතිය යටතේ වයස අවුරුදු 18ට වැඩි සියලුම පුද්ගලයන් යළි ලියාපදිංචි කෙරෙන අතර ලියාපදිංචි කිරීමේ දී දැනට ලබා ගන්නා ජීව දත්තවලට අමතරව ඇඟිලි සලකුණු, මුහුණේ විශේෂතා වැනි ජීව මිථික දත්ත ද ලබා ගැනේ.
එය හැඳින්වෙන්නේ sri lanka unique digital ID ලෙසිනි.
මෙම ව්‍යාපෘතියට අදාළව පුද්ගලයන් ලියාපදිංචි කිරීමේ දෙපාර්තමේන්තුව සමග ආගමන විගමන දෙපාර්තමේන්තුව, මෝටර් රථ ලියාපදිංචි කිරීමේ දෙපාර්තමේන්තුව, ආදායම් බදු දෙපාර්තමේන්තුව වැනි ආයතන ඒකාබද්ධ වෙයි. ව්‍යාපෘතිය අවසන් වීමෙන් පසු මෙම ඕනෑම ආයතනයකට ඇතුළත් වීමේ දී පුද්ගලයකුගේ ඇඟිලි සලකුණෙන් පමණක් ඔහු හඳුනා ගැනීමට හැකියාව ලැබේ.
මෙම ව්‍යාපෘතිය ආරම්භ කළ 2011 වසරේ සිට මේ දක්වා ව්‍යාපෘතිය වෙනුවෙන් වැය කර ඇති මුදල රුපියල් දෙසිය විසිපන් කෝටි හය ලක්ෂ අසූදහසකි.
ව්‍යාපෘතියේ කාලය දීර්ඝ කර ගැනීම සඳහා අවස්ථා තුනකදී කැබිනට් මණ්ඩල අනුමැතිය ද ලබා ගෙන තිබේ.
මෙම දෙපාර්තමේන්තුව මේ වන විට ක්‍රියාත්මක වන්නේ ජනාධිපතිවරයා යටතේ පවතින තාක්ෂණ අමාත්‍යාංශය යටතේ ය. ජනාධිපතිවරයාගේ දැඩි අධීක්ෂණය යටතේ ව්‍යාපෘතිය ක්‍රියාත්මක වන බව පුද්ගලයන් ලියාපදිංචි කිරීමේ කොමසාරිස් වියානි ගුණතිලක ‘අරුණ’ට ඊයේ (15 වැනිදා) පැවසීය.
-අරුණ
