මෙම අවස්ථාවේදී අදහස් දක්වමින් වෙළෙඳ අමාත්‍ය ආචාර්ය බන්දුල ගුණවර්ධන ප්‍රකාශ කළේ, පහ වසර ශිෂ්‍යත්වය සමත් දූදරුවන්ට හා විශ්වවිද්‍යාල අධ්‍යාපනය ලබන සිසු දරුවන්ට අධ්‍යාපන කටයුතු කරගෙන යාම සඳහා රජයෙන් ශිෂ්‍යාධාර මුදලක් ලබා දුන් නමුත් දැනට උසස්පෙළ හදාරන සිසු දරුවන් වෙනුවෙන් මූල්‍යමය ආධාරයක් ලබා දී නොමැති බැවින් ආර්ථික අපහසුතා මධ්‍යයේ සිය උසස් අධ්‍යාපනය සිසුන් සඳහා මූල්‍යමය ආධාරයක් ලබා දීම කාලීන අවශ්‍යතාවයක් බවට පත්ව ඇති බවයි.
එබැවින් සාමාන්‍ය පෙළ විභාගය විශිෂ්ට ලෙස සමත් වන අඩු ආදායම්ලාභී පවුල්වල දරුවන්ට උසස් පෙළ හැදෑරීමට ශිෂ්‍යාධාර ලබා දීම ඉලක්ක කරගෙන ප්‍රඥාබන්‍දු ශිෂ්‍යත්ව අරමුදල නිර්මාණය වන්නේ අමාත්‍ය බන්දුල ගුණවර්ධන මහතාගේ සංකල්පයකට අනුව ය.
ශ්‍රී ලංකාව තුළ පවත්නා විරැකියාවට විසඳුමක් වශයෙන් ආරම්භ කරන ලද උසස්පෙළ තාක්ෂණවේදය විෂය ධාරාවෙන් උසස්පෙළ හදාරන සිසු දරුවන් වෙනුවෙන් මෙම “ප්‍රඥාබන්‍දු” ශිෂ්‍යත්ව භාරකාර අරමුදල මෙසේ ස්ථාපිත කරන ලද බව ද අමාත්‍යවරයා එහිදී ප්‍රකාශ කර ඇත.
ප්‍රඥාබන්‍දු ශිෂ්‍යත්ව අරමුදල ආරම්භ කිරීම සඳහා අමාත්‍ය බන්දුල ගුණවර්ධන රුපියල් මිලියන 10ක මුදලක් යොදවා ඇති අතර එතුමාගේ ජන්ම දිනයට (16) සමගාමීව මෙම ශිෂ්‍යත්ව අරමුදල සමාරම්භ කිරීම ද විශේෂත්වයකි.
පෞද්ගලිකව ඕනෑ ම අයෙකුට දායක විය හැකි මෙම ශිෂ්‍යත්ව අරමුදලට සමාරම්භක අවස්ථාවේ දීම පෞද්ගලික ආයතන සහ දානපතීන් රුපියල් ලක්ෂ 150ක මුදලක් පරිත්‍යාග තිබේ. මෙම අරමුදලේ සමාරම්භය‍ට වැඩම කළ මහා සංඝරත්න‍‍යේ නොමද ආශිර්වාදය ද ඊට හිමි විය.
-පංචාලි අබේසේකර
