මේ වනවිටත් එහි සේවය කරන පුද්ගලයන්ගෙන් ඔවුන් ප‍්‍රකාශ ලබා ගනිමින් සිටියි.
සිිද්ධිය සම්බන්ධයෙන් කඩිනම් පරීක්ෂණයක් කි‍්‍රයාත්මක කරන ලෙස සෞඛ්‍ය සේවා අධ්‍යක්ෂ ජනරාල්වරයා විසින් ජාතික ඖෂධ අධිකාරියට ඊයේ (12) රාති‍්‍රයේ නියෝග කර තිබේ.
ශී‍්‍ර ලංකාව තුළ තම අධිකාරියේ අනුමැතියලත් රූපලාවණ්‍ය එන්නත් පමණක් භාවිත කිරීම සඳහා අවසර ලබාදී ඇති බව ජාතික ඖෂධ අධිකාරියේ අධ්‍යක්ෂ සහ සෞඛ්‍ය අමාත්‍යාංශයේ අතිරේක ලේකම් වෛද්‍ය අමල් හර්ෂ ද සිල්වා සඳහන් කළේය.
නාවල පදිංචි 47 හැවිරිදි පී.ඒ. ප‍්‍රියංගි නැමති මෙම වෛද්‍යවරිය බම්බලපිටිය විශාකා පාරේ පිහිටි මෙම පෞද්ගලික සායනයට රූපලාවන්‍ය ප‍්‍රතිකාර ලබාගැනීම සඳහා පැමිණ තිබුණේ ඊයේ (12) පස්වරු 4 ට පමණයි. එහිදී ඇයට ප‍්‍රතිජීවක ඖෂධ එන්නතක් ලබාදී ඇති අතර විනාඩි කිහිපයකට පසු ඇය මියගොස් ඇත.
මෙම වෛද්‍යවරිය කොළඹ රිජ්වේ ආර්යා ළමා රෝහලේ ප්ලාස්ටික් සැත්කම් අංශයේ විශේෂඥ වෛද්‍යවරියක් ලෙස සේවය කරමින් සිටි අයෙකු වීමද විශේෂත්වයකි.
මෙම වෛද්‍යවරිය මියයෑමේ සිද්ධිය සම්බන්ධයෙන් අදාළ සායන මධ්‍යස්ථානය පවත්වාගෙන ගිය නිමල් ගමගේ නැමති වෛද්‍යවරයා කොළඹ අපරාධ කොට්ඨාශය ඊයේ අත්අඩංගුවට ගෙන ඇති අතර, ඔහු අද (13) දිනය තුළ අධිකරණයට ඉදිරිපත් කරන බව පොලිස් මාධ්‍ය ප‍්‍රකාශක කාර්යාලය සඳහන් කළේය.
