ජනාධිපති ගෝඨාභය රාජපක්ෂගේ ද නාගරික සංවර්ධන හා නිවාස අමාත්‍යවරයා සහ අග්‍රාමාත්‍යවරයා ලෙස මහින්ද රාජපක්ෂගේ උපදෙස් පරිදි මෙරට විශාලතම රාජ්‍ය ආයතන කාර්යාල සමූහය වන සෙත්සිරිපාය තෙවන (III) වන බහු මහල් කාර්යාල පරිශ්‍රයේ ඉදිකිරීම් කටයුතු ඇරඹුණේ.

"සෞභාග්‍යයේ දැක්ම" ප්‍රතිපත්ති ප්‍රකාශය යටතේ කාර්යක්ෂම රාජ්‍ය සේවයක් සහ ජනතාවට පහසුවෙන් සිය සේවා අවශ්‍යතා සපුරා ගත හැකිවන සේ රජයේ කාර්යාල ස්ථාපිත කිරීමේ අරමුණින් මෙම ව්‍යාපෘතිය දියත් කෙරේ.

කොළඹ ආශ්‍රිත රථ වාහන තදබදය අවම කර ගැනීම, කොළඹ තදාසන්නයේ පිහිටි රාජ්‍ය ආයතන මෙම නව ගොඩනැගිල්ලේ ස්ථාපිත කිරීම, ජනතාවට පහසුවෙන් සිය සේවා අවශ්‍යතා සපුරාගත හැකි ආකාරයට රාජ්‍ය ආයතන ස්ථාපිත කිරීම යන කාරණා මුල්කරගෙන සෙත්සිරිපාය III වන අදියර ක්‍රියාත්මක වේ.

මෙය මහල් 25කින් සහ වර්ග අඩි මිලියන 1.37කින් සමන්විත කාර්යාල ගොඩනැගිලි සංකීර්ණයකි. නවීන පහසුකම්වලින් සමන්විත මෙම කාර්යාල පරිශ්‍රය මගින් රාජ්‍ය සහ අර්ධ රාජ්‍ය කාර්යාල රැසකට ඉඩ පහසුකම් සලසා ගැනීමට අපේක්ෂිත ය. වසර දෙකහමාරකින් මෙහි සියලු ඉදිකිරීම් කටයුතු අවසන් කිරීමට සැලසුම් කර ඇති අතර ඒ සඳහා ආයෝජනය කරන මුදල රුපියල් බිලියන 16.7 කි. ලංකාවේ රාජ්‍ය කාර්යාල පරිශ්‍රයක් සඳහා ඉදිකෙරෙන උසම ගොඩනැගිල්ල ද මෙය වීම විශේෂත්වයකි.

නාගරික සංවර්ධන අධිකාරිය පූර්ණ හිමිකම් සහ මූල්‍ය දායකත්වය දරන මෙම කාර්යාල පරිශ්‍රය බොහෝ මහජන පහසුකම්වලින් සමන්විත ය. මෙම ව්‍යාපෘතිය සම්පූර්ණ කළ පසු රජයේ සහ අර්ධ රාජ්‍ය කාර්යාල සමූහයකින් සමන්විත වීම සහ සියලු වාණිජ කටයුතු හා බැංකු කටයුතු සිදු කර ගැනීමට හැකිවීම හේතුවෙන් මහ ජනතාවට ඉහළ ප්‍රමිතියෙන් යුතු ගුණාත්මක සේවාවන් ලබා ගැනීමේ අවස්ථාව උදා වෙයි.

මේ සියලු සේවා සමඟින් රැස්වීම් ශාලා, විශේෂිත වූ උත්සව ශාලා සහ වාහන 710 ක් නවතාලිය හැකි රථගාලක් ද වෙනත් කටයුතු සඳහා වූ බහු කාර්ය ශාලා, ශාරීරික යෝග්‍යතා මධ්‍යස්ථාන වැනි පහසුකම්වලින් ද මෙය සමන්විත වේ.

මෙම බහු මහල් කාර්යාල සංකීර්ණය ඉදිකිරීම සඳහා ලංසු තැබීම් 06 ක් ඉදිරිපත් වූ අතර ඒවා සුපරික්ෂණයෙන් පසු MAGA ඉදිකිරීම් සමාගමට කොන්ත්‍රාත්තුව පිරිනැමීමට තීරණය විය. මහල් 25 කින් සහ වර්ග අඩි මිලියන 1.37 කින් සමන්විත වන මෙම ව්‍යාපෘතිය මෙයට පෙර රුපියල් බිලියන 22 වැය කර ඉදිකිරීම සඳහා තක්සේරු කර තිබිණි. එය රුපියල් බිලියන 16.7 කින් ඉදිකර නිමකිරීමට නාගරික සංවර්ධන අධිකාරිය සැලසුම් කිරීමත් සමඟ රුපියල් බිලියන 5.3 ක් රටට ඉතිරි කර දීමට නාගරික සංවර්ධන අධිකාරියට හැකියාව ලැබී තිබේ.

-පංචාලි අබේසේකර