කාබනික පොහොර සහ කාබනික දිලීර නාශක යොදා ගනිමින් සාර්ථක තක්කාලි වගාවක් සිදු කරන ගොවි මහතෙකු පිළිබද හාලිඇල, පන්වැව ප්‍රදේශයෙන් අපට වාර්තා වුණා. මඩිත්ත, පට්ටියගෙදර, පන්වැව ප්රදේශයේ පදිංචි කේ.එම්. පියසේන නම් මෙම ගොවි මහතා පසුගිය වසර 50 කට ආසන්න කාලයක් පුරා සිය ගොවිතැන් සිදු කර තිබුණේ රසායනික පොහොර භාවිතයෙන්.
එහෙත් ජනාධිපතිතුමාගේ වස විසෙන් තොර ලංකාවක් සංකල්පයට අනුගත වෙමින් පළමු වරට කාබනික පොහොර යොදා ගනිමින් තක්කාලි වගාවක් සිදු කර තිබෙනවා. වගාව ඉතා සාර්ථක වී ඇති අතර කාබනික දිලීර නාශක මගින් පත්‍රවල ඇතිවන දිලීර රෝග ද මැඩ පවත්වා ගැනීමට හැකිවුණා.
කාබනික පොහොර යොදා ගනිමින් අක්කර තුනහමාරක පමණ භූමි ප්‍රදේශයක ඉතා සාර්ථක එළවළු වගාවක් සිදු කරන පූගොඩ ප්රදේශයේ ගොවි මහතෙකු පිලිබදව ද අපට වාර්තා වුණා. විශ්‍රාමික ගොවි පර්යේෂණ සහකාර නිලධාරියෙකු වන විමල් වික්‍රමසිංහ මහතා මෙම වගාව සිදු කරන අතර රසායනික පොහොරවලින් ලබාගත් අස්වැන්නට වඩා වැඩි අස්වැන්නක් මෙමගින් ලබාගත හැකි බවද සදහන් කරනවා.
ඇඹිලිපිටිය, ගගේයාය ප්‍රදේශයෙන් ද සාර්ථක කාබනික වගායක් සිදුකරන ගොවි මහතෙකු පිළිබද අපට වාර්තා වුණා. ගගේයාය ප්රදේශයේ පදිංචි ඩබ්ලිව්. කේ. විල්ෆ්‍රඩ් මහතා කෘෂි නිලධාරීන්ගේ ද උපදෙස් ලබාගනිමින් කාබනික පොහොර භාවිත කර ගෙවතු වගාව මෙන්ම කුඹුරු වගාව ද සාර්ථක ලෙස සිදු කිරීමට සමත්ව සිටිනවා.
පොළොන්නරුව දිස්ත්‍රික්කයේ ගොවීන්ද කාබනික වගාවට යොමුවී ඇති බවයි අප වාර්තාකරුවන් සදහන් කළේ. හිගුරක්ගොඩ ප්‍රාදේශීය ලේකම් කොට්ඨාසයේ මසකට කාබනික පොහොර මෙට්‍රික් ටොන් 100 ක් පමණ නිෂ්පාදනය කිරීමේ මධ්‍යස්ථානයක් ද තරුණ ගොවි මහතෙකු ආරම්භ කර තිබෙනවා. හරිතාගාර සංකල්පයට අනුව කාබනික පොහොර පමණක් යොදා ගනිමින් මාළුමිරිස්, කහ ඇතුලු භෝග රැසක් වගා කිරීමට ද ඔහු සමත්වුණා.
-අයි.ටී.එන්
