පාර්ලිමේන්තුව නියෝජනය කරන ආණ්ඩුවේ හවුල්කාර පක්ෂ නායකයන්ගේ රැස්වීම ඊයේ පාර්ලිමේන්තුවේදී පැවැත්වීමට නියමිතව තිබුණත් එය නොපැවැත්වූ අතර එය අද (23 දා) පස්වරුවේ අරලියගහ මන්දිරයේ දී පැවැත්වෙන බව පක්ෂ නායකයෙක් සඳහන් කළේය.
මෙහිදී ආණ්ඩුවේ හවුල්කාර පක්ෂ කෙරවළපිටිය බලාගාරයේ කොටසක් ඇමරිකානු සමාගමකට දීම ගැන පසුගියද ජවිපෙ නායක අනුර දිසානායක විසින් හෙළිදරව් කිරීමක් සිදු කළ අතර එහිදී ඔහු පෙන්වා දුන්නේ මෙය කැබිනට් මණ්ඩලයට නොදන්වා හොර රහසේ සිදු කළ ගනුදෙනුවක් බවයි. එසේම මධ්‍යම රාත්‍රියේදී මෙම ගිවිසුම අදාල අමරිකානු සමාගම් නියෝජිතයා සමඟ අත්සන් කිරීම සිදුකර ඇති බවත් ඔහු චෝදනාකර තිබිණි.
ආණ්ඩුවේ හවුල්කාර පක්ෂ අවධාරණය කරන්නේ නැගෙනහිර ජැටිය ප්රශ්නය බේරුමක් කර ගත්තා සේ මේ ගැටළුවද විසඳා ගන්නා බවයි. එනම් මෙම ගිවිසුම අහෝසි කරන තැනට කටයුතු කෙරෙන බවය.
මේ අතර කෙරවලපිටිය බලාගාරය ඇමෙරිකානු සමාගමකට ලබාදීම ගැන මෙතෙක් එකඟතාවක් ඇතිවී නැති බවත් දැනට පවතින්නේ දෙපාර්ශවය අතර සංකල්පීය එකඟතාවයක් පමණක් බවත් කැබිනට් මාධ්‍ය ප්‍රකාශක, ජනමාධ්‍ය අමාත්‍ය ඩලස් අලහප්පෙරුම මහතා පැවසීය.
අමාත්‍ය ඩලස් අලහප්පෙරුම මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේ දී අද (22) පැවති කැබිනට් ප්‍රකාශ දැනුම් දීමේ මාධ්‍ය හමුවේදී මාධ්‍යවේදියෙකු නැගූ පැනයකට පිළිතුරු දෙමිනි.
තමන් හිටපු විදුලිබල අමාත්‍යවරයා ලෙස සිටියදී මේ සම්බන්ධයෙන් තම ස්ථාවරය ජනාධිපතිවරයාට හා කැබිනට් මණ්ඩලයට දැනුම් දුන් බව කී ඇමතිවරයා එය ලංකා විදුලිබල මණ්ඩලයේ ස්වභාවික ද්‍රව වායු බලාගාර පිළිබඳ ටෙන්ඩර කටයුතුවලට බාධාවක් නොවන අයුරින් සිදුවිය යුතුය යන්න තම ස්ථාවරය බව ද කීවේය.
රටට අවශ්‍ය ස්වභාවික ද්‍රව වායු ලබාගැනීමේ දී කිසියම් රටක ඒකාධිකාරයක් ඇති නොවිය යුතු බව ද ඇමතිවරයා පැවසීය.
මේ සම්බන්ධයෙන් විදුලිබල අමාත්‍යවරයා ඉදිරියේ දී ප්‍රකාශයක් කරනු ඇතැයි ද අලහප්පෙරුම මහතා සඳහන් කළේය.
