මේ අතර ඊයේ රටපුරා විරෝධතා සංවිධාන කළ ජෝසප් ස්ටාලින් වහාම අත්අඩංගුවට ගන්නා ලෙස ඉල්ලමින් පොලිස් මූලස්ථානයට පැමිණිල්ලක් ඉදිරිපත්වුණා. උද්ඝෝෂණ නිසා පාසල් දරුවන්ගේ මූලික අයිතිවාසිකම් උල්ලංඝනය වන බවට නීතිපතිවරයාටද පැමිණිල්ලක් භාරදී තිබෙනවා.
ගුරු විදුහල්පති වැටුප් විෂමතාව පිළිබද ගැටලුව මුල් කර ගනිමින් ක්‍රියාත්මක වන වෘත්තිය ක්‍රියාමාර්ගයට අදට දින 88 ක් සපිරෙනවා. ඔන්ලයින් ඉගැන්වීම් වලින්ද ඉවත්ව ක්‍රියාත්මක කරන මෙම වෘත්තීය ක්‍රියාමාර්ගයට තවදුරටත් සමාජය තුළින් එල්ලවන්නේ දැඩි විරෝධයක්. ඊයේ දිනයේ දී විරෝධතා සංවිධාන කළ ලංකා ගුරු සංගමයේ ලේකම් ජෝසප් ස්ටාලින් වහාම අත්අඩංගුවට ගන්නා ලෙස ඉල්ලමින් අපේ ජනබල පක්ෂය පොලිස් මූලස්ථානයට අද පැමිණිල්ලක් ඉදිරිපත් කළා.
මේ අතර ගුරුවරුන්ගේ වෘත්තීය ක්‍රියාමාර්ගය නිසා පාසල් දරුවන්ගේ මූලික අයිතිවාසිකම් උල්ලංඝනය වන බවට සිංහලේ ජාතික ඒකාබද්ධ එකමුතුව නීතිපතිවරයාට පැමිණිල්ලක් භාරදුන්නා.
කෙසේ වෙතත් ලංකා ගුරු සංගමය පවසන්නේ පාසල් ආරම්භ වුවද ගුරුවරුන් අඛණ්ඩවම වෘත්තිය ක්‍රියාමාර්ගයෙහි නිරත වන බවයි.
මේ අතර අයිතිවාසිකම් ඉල්ලාසිටිනවා සේම යුතුකම් ඉටුකිරීමට ද ගුරුවරයා බැදීසිටින බව නීතිවිශාරදයෙකු වන මහාචාර්ය ප්‍රතිභා මහානාමහේවා මහතා පවසනවා. ගුරු විදුහල්පති වෘත්තිය ක්‍රියාමාර්ගය මෙන්ම උසස් පෙළ සහ 5 ශ්‍රේණියේ ශිෂ්‍යත්ව විභාග කල් දැමීම සම්බන්ධයෙන් අද පාර්ලිමේන්තුවේදී ද අදහස් පළකෙරුණා.
-පංචාලි අබේසේකරස්ටාලින් අත්අඩංගුවට ගන්නා ලෙස පැමිණිලි !
