අසාන්ජ්, ඇමරිකාව විසින් ලෝකය පුරා රටවල ඔත්තු බැලූ අයුරු සහ ඔවුන් විසින් අනෙක් රටවල ක්‍රියාකාරකම් පිලිබඳ සොයා ගන්නා ලද රහසිගත තොරතුරු හෙලිකළ විකිලීක්ස් වෙබ් අඩවියේ හිමිකරුවා සහ නිර්මාපකයා වේ. ඔහු විකිලීක්ස් හරහා ලෝකයේ රටවල් බොහෝමයක බුද්ධි අංශවල සහ පාලකයන්ගේ අඳුරු ක්‍රියාද හෙලි කිරීම පියවර ගෙන තිබු අතර ඒ නිසා රටවල් බොහෝමයක් අපකීර්තියට පත්වූ අතර ඒවා අතර අර්බූද පවා හට ගැනීමට හේතු වුයේය.
මේ තත්වය නිසා දැඩි ලෙස කළබලයට පත්වූ රටවල රහසිගත ඒකමතියක ප්‍රතිඵලයක් ලෙස ස්වීඩනය විසින් අසාන්ජ්ට විරුද්ධව ලිංගික හිරිහැර කළ බවට චෝදනාවක් එල්ල කරමින් අත්අඩංගුවට ගැනීමට නියෝග නිකුත් කරන ලදි. ඊට සහයෝගය දක්වමින්, ඒ වන විට බ්‍රිතාන්‍යයේ සිටි අසාන්ජ්ව අත්අඩංගුවට ගෙන ස්වීඩනයට භාර දීමට බ්‍රිතාන්‍ය සූදානම් වන බව අවබෝධකරගත් අසාන්ජ් ලෝකයෙන් දේශපාලන රැකවරණ ඉල්ලා සිටියේය. ඊට ප්‍රතිචාර දක්වමින් ඉක්වදෝර රජය තම රටේ දේශපාලන රැකවරණ ලබා දීමට කැමැත්ත පළකල හෙයින් අසාන්ජ් වහාම බ්‍රිතාන්‍යයේ පිහිටි ඉක්වදෝර තානාපති කාර්යාලයට ගිය අතර තානාපති වරප්‍රසාද නිසා පොලීසියට ඔහුව අත්අඩංගුවට ගැනීමට නොහැකි විය.
