එම මාධ්ය නිවේදනය මෙසේය.
අල්ලස් හෝ දූෂණ විරෝධී කොමිෂන් සභාවට සාමාජිකයන් පත් කිරීම වහාම සිදු කළ යුතුය.
ශ්රී ලංකාව බ්රිතාන්ය යටත්විජිත පාලනයෙන් නිදහස ලබාගැනීමෙන් අනතුරුව විවිධ පාලන සමයන් තුළදී අල්ලස හා දූෂණය වර්ධනය වූ ආකාරය හා රාජ්ය පාලනය පටු ආකාරයෙන් දේශපාලනීකරණයට ලක් වූ ආකාරය සාධරණ සමාජයක් සඳහා වන ජාතික ව්යාපාරය විසින් විවිධ අවස්ථාවලදී පෙන්වා දී ඇතත් එම තත්ත්වය අදට ද නොවෙනස් ව දක්නට ලැබීම ජාතියේ අවාසනාවකි. එහි මෑත කාලීනම උදාහරණය වන්නේ ජාත්යන්තර මූල්ය අරමුදලින් ලබා දීමට නියමිතව තිබූ දෙවැනි වාරිකය මේ දක්වා ම නොලැබිමට එවැනි තත්ත්වයන් හේතු වී ඇති ආකාරයයි.
ජාත්යන්තර මූල්ය අරමුදල ප්රකාශ කර ඇති ආකාරයට මේ වන විට රටට ලබා දිය යුතු දෙවැනි වාරිකය කල් පසුවීමට ප්රධාන හේතුව වී ඇත්තේ අල්ලස හා දූෂණය මර්දනය කිරීම සඳහා යෝජනා වී තිබුණ යාන්ත්රණය ඒ ආකාරයට ක්රියාවට නංවා නැති බවට ඔවුන් නිගමනය කිරීමයි. එය කනගාටුදායක තත්ත්වයකි.
