මෙම පද්ධතිය ඔස්සේ රෝගීන් මිලියන නමයහමාරකට අධික පිරිසක් ලියාපදිංචි වී සිටින අතර රෝගීන්ගේ ඉලෙක්ට්රොනික වෛද්ය වාර්තා මිලියන විසිතුනක් පවත්වාගෙන යනු ලබන බව ශ්රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA)පවසයි.
මෙම පද්ධතිය මඟින් රෝගීන් ලියාපදිංචි කිරීම, පරීක්ෂා කිරීම, ඖෂධ ඇනවුම් කිරීම, රසායනාගාර පරීක්ෂණ, විකිරණ පරීක්ෂණ ආදී සේවාවන් රැසක් බල ගන්වා ඇති බවයි වාර්තා වන්නේ.
මෙමගින් රෝහල වෙත රෝගියෙකු පැමිණීමෙන් පසු මෙම පද්ධතිය ඔස්සේ රෝගියා ලියාපදිංචි කෙරෙන අතර ඔහුට ම අනන්ය අංකයක් සහ කේතයක් (Barcode) හිමිවේ. රෝග විස්තර, ලබාගත් ප්රතිකාර, අදාළ සෞඛ්ය වාර්තා, නියම කරන ලද ඖෂධ ඇතුළු සියලු විස්තර ඊට අයත් වේ. නැවත වරක් එම පුද්ගලයා රෝහල වෙත පැමිණි විට පහසුවෙන් ප්රතිකාර ලබා දීමට ද මේ හරහා හැකි වේ. තවද රෝහලක සිට තවත් රෝහලකට රෝගියෙක් මාරු කර යැවීමේදී එම රෝගියාට අදාළ සියලු විස්තර ද මෙම පද්ධතිය හරහා එම රෝහල වෙත ලබා දීමේ පහසුකමද ඉදිරියේදී ලබා දීමට නියමිතව තිබේ.
මෙම පද්ධතිය ක්රියාත්මක වීමත් සමඟ විශේෂයෙන් ම රෝහල් පද්ධතිය පවත්වාගෙන යෑමේ මෙහෙයුම් පිරිවැය අවම කර ගැනීමත් බාහිර රෝගීන් කළමනාකරණය, නේවාසික රෝගීන් කළමනාකරණය, ඖෂධ තොග කළමනාකරණය, සායන කළමනාකරණය මෙන් ම රෝගීන්ගේ සෞඛ්ය දත්ත වාර්තා පවත්වාගෙන යෑමද පහසු බවත් කඩදාසි මත පදනම්ව පවත්වාගෙන ගිය සෞඛ්ය වාර්තා මෙම පද්ධතිය හරහා ක්රියාත්මක වීමෙන් කඩදාසි භාවිතය අවම වීම නිසා පරිසර හිතකාමී සෞඛ්ය සේවාවකට මග පෑදන බව තොරතුරු හා සන්නිවේදන තාක්ෂණ නියෝජිතායතනය (ICTA)පවසයි.
රජය මඟින් ජනතාවට ලබා දෙන සේවාවන් මෙසේ ඩිජිටල්කරණය කිරීමෙන් ඩිජිටල් ශ්රී ලංකාවක් කරා යන ගමන්මඟ තවත් අර්ථවත් කිරීමට හැකිවී තිබෙන බවයි ශ්රී ලංකා තොරතුරු හා සන්නිවේදන තාක්ෂණ නියෝජිතායතනය සඳහන් කරන්නේ.
