පිළිකා රෝගී තත්ත්වයක් හේතුවෙන් ඉතාලියේ MONZA නගරයේ VIA MONTE CASSINO, NO 08 දරණ ලිපිනයේ Casa Di Cura හි ප්‍රතිකාර ලබමින් සිටියදී හෙතෙම අවසන් හුස්ම හෙළූ බව පවුලේ සාමාජිකයෙක් සඳහන් කළේය.
1943 වසරේ නොවැම්බර් මස 9 වනදා මීගමුවේදී උපත ලැබූ ඇන්ඩෲ ජයමාන්න මහතා, මියැදෙන විට 71 වියෙහි පසුවිය. ඔහු අවසන් කාලයේ ජීවත් වූයේ ඉතාලියේය.
1962 දී විජය චිත‍්‍රාගාරයේ සහය කැමරා ශිල්පියෙකු ලෙස වෘත්තීය ජීවිතය ආරම්භ කළ ඔහු, හාරලක්ෂය, මරුවා සමඟ වාසය, හඳයා, හංසවිලක්, තුන්වෙනියාමය, සුද්දිලාගේ කතාව, විසිදැල යන චිත‍්‍රපටවල කැමරා අධ්යක්ෂවරයා ලෙස කටයුතු කර ඇත.
ඇන්ඩෲ ජයමාන්න මහතා හොදම කැමරා ශිල්පියා ලෙස චිත‍්‍රපට සම්මාන උළෙල 12 කට වැඩි ගණනකදී සම්මානයට පාත‍්‍ර වි තිබේ.
ටයිටස් තොටවත්තයන් විසින් අධ්‍යක්‍ෂණය කෙරුණු හාර ලක්‍ෂයේ චිත‍්‍රපටය ඔහුගේ විශිෂ්ඨතම කැමරාකරණය බව විචාරකයන් පවසති.
1971 දී තිරගත කෙරුණු සිගරට් කොටය කෙටි චිත‍්‍රපටයේත්, 1973 දී තිරගත කෙරුණු පිපෙන කුසුම කෙටි චිත‍්‍රපටයේත් අධ්යක්ෂවරයා වුයේද ඇන්ඩෲ ජයමාන්න මහතායි.
වාර්තා චිත‍්‍රපට කිහිපයක්ද ඔහු විසින් අධ්‍යක්‍ෂණය කර ඇත.
අභාවප‍්‍රාප්ත ඇන්ඩෲ ජයමාන්න මහතාගේ අවසන් කටයුතු ඉදිරියේදී දැනුම්දීමට නියමිත බව පවුලේ සාමාජිකයෙකු සඳහන් කළේය.
