දකුණේ පාතාල මර්දනයට පොලිස්පති සැරසෙද්දී අදත් දකුණෙන් වෙඩි පත්තු වෙයි

පළාත්භාර ජ්‍යේෂ්ඨ නියෝජ්‍ය පොලිස්පතිවරයා සහ පොලිස් විශේෂ කාර්යය බළකා නිලධාරීන්ට අදාළ උපදෙස් ලබා දී ඇති බව වාර්තා වේ.

ගාල්ල සහ ඇල්පිටිය පොලිස් කොට්ඨාශවල පසුගිය දිනවල සිදුවු වෙඩි තැබීමේ සිදුවීම් සම්බන්ධයෙන් සොයා බැලීම සඳහා පොලිස්පති දේශබන්දු තෙන්නකෝන් අදාළ ප්‍රදේශවල ඊයේ (13) සංචාරයක නිරත වු අතර අනතුරුව කොස්ගොඩ පොලිස් ස්ථානයේදී ගාල්ල සහ ඇල්පිටිය කොට්ඨාශවල ජ්‍යේෂ්ඨ පොලිස් නිලධාරීන් කැඳවා සාකච්ඡාවක් ද පවත්වනු ලැබීය.

එහිදි අපරාධ පරීක්ෂණ දෙපාර්තමේන්තුව, අපරාධ වාර්තා කොට්ඨාශය, කොළඹ අපරාධ කොට්ඨාශය, ප්‍රජා පොලිස් කොට්ඨාශය, පොලිස් විශේෂ කාර්යය බළකාය හා බුද්ධි අංශ ඇතුළු සියලු නිලධාරීන් කැඳවා මෙම අපරාධ විසඳීමේ දී එකිනෙක සම්බන්ධීකරණය වීම, තොරතුරු හුවමාරු කරගැනීම හා නිලධාරින් කටයුතු කළ යුතු ආකාරය පිළිබඳව පොලිස්පති දේශබන්දු තෙන්නකෝන් විසින් නියෝග ලබා දී ඇති බව වාර්තා වේ.

මෙම සිදුවීම්වලට සම්බන්ධ සැකකරුවන් කඩිනමින් අනාවරණය කරගැනීමට අවශ්‍ය ක්‍රියාමාර්ග ගන්නා ලෙස ද පොලිස්පතිවරයා එහිදි උපදෙස් ලබා දී තිබේ.

මේ අතර අම්බලන්ගොඩ පොලිස් වසමේ ඉඩන්තොට පොනදුව ප්‍රදෙශයේ, මත්කුඩු ජාවාරමේ නිරත පාතාල සාමාජික අගම්පොඩි සජිත් සමන් පියන්ත නොහොත් 'සමන්කොල්ලා' නැමැත්තාගේ නිවසට අද (14) අලුයම ⁣වෙඩි ප්‍රහරයක් එල්ල වී ඇත.

වෙඩිතැබීමෙන් කිසිවෙකුටත් තුවාල සිදුව නොමැති බව අම්බලන්ගොඩ පොලීසිය පවසයි.

තාප්පයට හා නිවසේ දොරට වෙඩි උණ්ඩ කිහිපයක් එල්ල වී ඇති අතර, අදාළ සිදුවීම වෙන අවස්ථාවේ සමන්කොල්ලා නැමැත්තාගේ මව සහ සහෝදරියන් තිදෙනෙකු නිවසේ සිට ඇත.