ජනාධිපති රනිල් වික්‍රමසිංහ, ජවිපෙ නායක අනුර කුමාර දිසානායක මහත්වරුන්ට අමතරව රහස් පොලීසියේ හිටපු අධ්‍යක්‍ෂ ජ්‍යෙෂ්ඨ පොලිස් අධිකාරී ශානි අබේසේකර, හිටපු හමුදාපති ෆීල්ඩ් මාර්ෂල් සරත් ෆොන්සේකා, ජනාධිපති නීතිඥවරුන් වන ජේ.සී වැලිඅමුණ සහ ආචාර්ය ජයම්පති වික්‍රමරත්න යන මහත්වරුන් සම්බන්ධයෙන්ද දේශපාලන පළිගැනීම් සොයා බැලීමේ ජනාධිපති කොමිෂම විසින් කරන ලද නිර්දේශයන්ද බල රහිත කරමින් අභියාචනාධිකරණය අදාළ රිට් ආඥාව නිකුත් කළේය.
දේශපාලන පළිගැනීම් සොයා බැලීම සඳහා පත් කරන ලද ජනාධිපති කොමිෂමේ නිර්දේශයන් බල රහිත කරන රිට් ආඥාවන් නිකුත් කරන්නැයි ඉල්ලමින් ඔවුන් විසින් ගොනුකළ පෙත්සම් වල තීන්දුව ප්‍රකාශයට පත් කරමින් අභියාචනාධිකරණය මෙම රිට්අඥාව නිකුත් කළේය.
දීර්ඝ නඩු විභාගයකින් අනතුරුව අභියාචනාධිකරණ සභාපති විනිසුරු නිශ්ශංක බන්ධුල කරුණාරත්න විනිසුරුවරුන් වන ඩී.එම්.සමරකෝන් සහ ලපාර් තාහිර් යන මහත්වරුන්ගෙන් සැදුම්ලත් විනිසුරු මඩුල්ල අදාළ තීන්දුව ප්‍රකාශයට පත් කළේය.
ජනාධිපති රනිල් වික්‍රමසිංහ, ජවිපෙ නායක අනුර කුමාර දිසානායක රහස් පොලීසියේ හිටපු අධ්‍යක්‍ෂ ජ්‍යෙෂ්ඨ පොලිස් අධිකාරී ශානි අබේසේකර, හිටපු හමුදාපති ෆීල්ඩ් මාර්ෂල් සරත් ෆොන්සේකා, ජනාධිපති නීතිඥවරුන් වන ජේ.සී වැලිඅමුණ සහ ආචාර්ය ජයම්පති වික්‍රමරත්න යන මහත්වරුන් ගොනු කරන ලද මෙම පෙත්සම්වල වගඋත්කරුවන් වශයෙන් දේශපාලන පලිගැනීම් සොයා බැලීමේ කොමිසමේ සභාපති හිටපු ශ්‍රේෂ්ඨාධිකරණ විනිසුරු උපාලි අබේරත්න හිටපු අභියාචනාධිකරණ විනිසුරු චන්ද්‍රා ජයතිලක සහ හිටපු පොලිස්පති චන්ද්‍ර පුනානදු මහත්වරුන් කර තිබිණී.
මෙම කොමිසම තමන්ට එරෙහිව කරන ලද නිර්දේශයන් බලරහිත කරන රිට් ආඥා නිකුත් කරන්නැයි ඉල්ලා පෙත්සම්කරුවෝ මෙම පෙත්සම් ගොනු කර තිබිණී.
මේ සම්බන්ධයෙන් පැවැති දීර්ඝ නඩු විභාගයකින් අනතුරුව පෙත්සම්කරුවන්ගේ ඉල්ලීම් පිළගත් අධිකරණය අදාළ රිට් ආඥාවන් නිකුත් කළේය.පෙත්සමිකරුවන් වෙනුවෙන් ජනාධිපති නීතිඥවරුන් වන ෆයිස් මුස්තාපා සහ ඉරාජ් සිල්වා යන මහත්තුරු පෙනී සිටියහ.
-P.M
