2019 වර්ෂයේ දී මූර්ත ඒක පුද්ගල ආදායම රු.හය ලක්ෂ පන්දහස් හත්සිය නවයක් වූ අතර 2021 වර්ෂයේ දී එය රු.පන් ලක්ෂ අනූ දෙදහස් හාරසීය දහතුන දක්වා පහළ යාමක් පෙන්නුම් කරයි. 2023 වර්ෂය වන විට එය රු.පන් ලක්ෂ තිස් දෙදහස් හයසීය හතළිස් හයක් දක්වා පහළ යාමක් පෙන්නුම් කරන බව මහ බැංකු වාර්තාවේ සඳහන් වේ.

මේ කාලය තුළ රටේ මූර්ත දල දේශීය නිශ්පාදනය සැලකිය යුතු ආකාරයකින් පහළ යාම මෙයට හේතුවේ. 2019 දී රටේ මූර්ත දළ දේශීය නිෂ්පාදනය රුපියල් බිලියන 13,206 වූ අතර 2021 වර්ෂය වන විට එය බිලියන 13,125 ලෙසත් වාර්තා වී ඇත.

2023 අවසන් වන විට එය රුපියල් බිලියන 11,881 දක්වා පහළ ගොස් ඇත. මෙම හේතුවෙන් රටේ එක් පුද්ගලයෙකුගේ මාසික මූර්ත ආදායම ද රු.6,150කට ආසන්න ප්‍රමාණයකින් පහළ ගොස් ඇත.

මූර්ත ඒක පුද්ගල ආදායම මඟින් රටක පුද්ගලයන්ගේ මිලදී ගැනීමේ හැකියාව සැලකිල්ලට ගනිමින් ආර්ථිකයේ සුබසිද්ධිය හෝ යහපැවැත්ම මැනීම සඳහා භාවිත කරන බව මහ බැංකුව විසින් නිකුත් කරනු ලබන වාර්තාවේ සඳහන් වේ.

2020 වසරෙන් පසුව ඇති වූ ආර්ථික අර්බුදයන් නිසා මෙරට ආර්ථික වර්ධනය ඇණ හිටියේ සෘණ අගයන් ගනිමිනි. යළි වර්ධනය කරගැනීමට සමත් වූයේ පසුගිය වසරේ තුන්වන කාර්තුවේ සිටය. 2023 තුන්වන කාර්තුවේදී 1.6 ක සිහ හතරවන කාර්තුවේදී 4.5 ක වර්ධනයක් ඇති විය. කෙසේ නමුත් වත්මන් ආර්ථික ප්‍රතිසංස්කරණයන් අඛන්ඩව ක්‍රියාත්මක වුවහොත් යළි 2019 වසරේ ආර්ථික තත්වයට සමපාත වෙනුයේ 2027 අවුරුද්දේ දී බවට පුරෝකතනය කර ඇත. කෙසේ නමුත් බලාපොරොත්තු වූවාට වඩා වැඩි වේගයකින් ආර්ථිකය වර්ධනය වෙමින් පවතින තත්වයන් අනුව ඊට පෙර මෙම ඉලක්ක සම්පූර්ණ වෙනු ඇතැයිද පැවසේ.

-P.M