එකී යෝජනා ද්විත්වය, ජාත්‍යන්තර මූල්‍ය අරමුදල විසින් සකස් කරන ලද නිර්නායක සමග නොගැලපීම මෙසේ එම යෝජනා ප්‍රතික්ෂේප කිරීමට හේතුවයි.
ඒ අනුව, පෞද්ගලික බැදුම්කර හිමියන් සහ රජයේ නියෝජිතයන් අතර ලන්ඩනයේ පැවති පළමු වටයේ සාකච්ඡා එකඟතාවයකට පැමිණීමෙන් තොරව අවසන් වී තිබේ.
කෙසේ වෙතත්, ජූනි මාසය වන විට, සමස්ත ණය ප්‍රතිව්‍යුහගතකරණ ක්‍රියාවලිය අවසන් කිරීමටත්, ඩොලර් බිලියන 2.9 ක විස්තීරණ ණය පහසුකමේ මීළඟ වාරිකය වූ ඩොලර් මිලියන 337 ක ලබා ගැනීමත් ශ්‍රී ලංකාවට හැකිවනු ඇති බවට ලංඩන් සාකච්ඡා සදහා සහභාගී වූ ජනාධිපති කාර්ය මණ්ඩල ප්‍රධානී සාගල රත්නායක පවසයි.
මේ වන විට, වොෂින්ටනයේ පැවැත්වෙන ලෝක බැංකු සහ ජාත්‍යන්තර මූල්‍ය අරමුදලේ වසන්ත රැස්වීම අවසන් වූ සැනින්, බැදුම්කර හිමියන් සමග දෙවන වටයේ සාකච්ඡා ආරම්භ කරන බව සාගල රත්නායක පවසයි.
එම සාකච්ඡාව සදහා සහභාගීවීමට මහබැංකු අධිපති සහ මුදල් අමාත්‍යංශයේ ලේකම් වොෂින්ටනය බලා පිටත්ව යාමට නියමිතය.
ශ්‍රී ලංකාව ප්‍රතිව්‍යුහගත කිරීමට අපේක්ෂිත ණය වල මුලු වටිනාකම ඇමරිකානු ඩොලර් බිලියන 37 කි. ඉන් ඇමරිකානු ඩොලර් බිලියන 20 ක් ම, පෞද්ගලික ණය හිමියන්ගෙන් ලබාගෙන තිබේ.
-P.M
