උමා ඔය බහුකාර්ය සංවර්ධන ව්‍යාපෘතිය විවෘත කිරීමේ උත්සවයේ ප්‍රධාන ආරාධිත අමුත්තා ලෙස ඉරාන ජනාධිපතිවරයා ලබන බදාදා මෙරට සංචාරයක නිරත වීමට නියමිතව ඇති තත්ත්වයක් තුළ මෙලෙස තොරතුරු වාර්තා වේ.
ඉරාන ජනාධිපතිවරයාගේ මෙරට සංචාරය පිළිබඳව පූර්ව ආරක්ෂක කටයුතු සොයා බැලීම සඳහා ඉරාන ආරක්ෂක අංශවල ජ්‍යෙෂ්ඨ නිලධාරී කණ්ඩායමක් ඊයේ දිවයිනට පැමිණියා.
ඉරාන ජනාධිපතිවරයාගේ මෙරට සංචාරයට ආරක්ෂාව සැපයීම සඳහා ගත යුතු ආරක්ෂක විධිවිධාන සම්බන්ධව ආරක්ෂක අමාත්‍යාංශ ලේකම් ජෙනරාල් කමල් ගුණරත්න මහතාගේ ප්‍රධානත්වයෙන් ඊයේ පැවති සාකච්ඡාවකදී උපදෙස් ලබාදී ඇත.
ඉරාන ජනාධිපති ඊබ්‍රහිම් රයිසි මත්තල ජාත්‍යන්තර ගුවන්තොටුපල වෙත සෘජුවම පැමිණීමට නියමිත අතර එතැන් සිට විශේෂ ආරක්ෂාවක් යටතේ ඔහු උමා ඔය ව්‍යාපෘති භූමිය වෙත කැඳවා ගෙන යනු ලබයි.
විවෘත කිරීමේ උත්සවයෙන් පසු ඉරාන ජනාධිපතිවරයා යළි මත්තල හරහා මෙරටින් පිටත්ව යෑමට නියමිතව තිබේ.
ඉරාන ජනාධිපතිවරයාගේ මෙම සංචාරය සම්බන්ධයෙන් ඊශ්‍රායලයේ මොසාඩ් ඔත්තු සේවාව මෙන්ම ඇමරිකානු එෆ්.බී.අයි. ඔත්තු සේවාව දැඩි අවධානයෙන් සිටින බවයි රාජ්‍ය තාන්ත්‍රික ආරංචි මාර්ග සඳහන් කර සිටින්නේ.
මෙරට සියලුම බුද්ධි ඒකක ඉරාන ජනාධිපතිවරයාගේ සංචාරයේ ආරක්ෂක කටයුතු සඳහා එක්ව වන අතර යුද හමුදා කමාන්ඩෝ ඒකකය ප්‍රභූ ආරක්ෂාව භාරව කටයුතු කරන බව ඉහළ පෙලේ ආරක්ෂක මූලාශ්‍රයක් තහවුරු කළේ ය.
2023 සැප්තැම්බර් මාසයේදී ශ්‍රී ලංකා ජනාධිපති රනිල් වික්‍රමසිංහ එක්සත් ජාතීන්ගේ සමුළුව සඳහා එක්වූ මොහොතේදී උමා ඔය ව්‍යාපෘතිය ජනතා අයිතියට පත් කිරීමේ උත්සවයට සහභාගී වන ලෙස ඉරාන ජනාධිපතිවරයාට ආරාධනා කරනු ලැබීය.
-P.M
