කටුනායක බණ්ඩාරනායක ජාත්‍යන්තර ගුවන්තොටුපොළ (BIA) පුළුල් කිරීමේ ව්‍යාපෘතිය සහ සැහැල්ලු දුම්රිය (LRT) ව්‍යාපෘතිය ඇතුළු ව්‍යාපෘති ගණනාවක් මෙලෙස සංවර්ධනය කිරීමට නියමිතය.
දෙදින නිල සංචාරයක් සඳහා මෙරටට පැමිණ සිටින ජපාන විදේශ කටයුතු ඇමැතිනි යෝකෝ කමිකාවා ජනාධිපතිවරයා හමුවේ පවසා සිටියේ ශ්‍රී ලංකාව ආර්ථික අර්බුදයෙන් මුදා ගනිමින් රටේ ආර්ථිකය ස්ථාවර කිරීමට ජනාධිපති රනිල් වික්‍රමසිංහ ගෙන යන වැඩපිළිවෙල ඉතාමත් සාර්ථක බවත් එය අගය කළ යුතු බවයි.
ශ්‍රී ලංකාව ආර්ථික අර්බුදයෙන් මුදා සිදුකරන ආර්ථික ප්‍රතිසංස්කරණ ක්‍රියාවලිය ද මෙහි දී ජපාන විදේශ ඇමැතිනි යෝකෝ කමිකාවා ඇගයීමට ලක් කෙරිණි. ශ්‍රී ලංකාවේ ණය ප්‍රතිව්‍යුහගත කිරීම සම්බන්ධයෙන් වන අවබෝධතා ගිවිසුම කඩිනමින් අත්සන් තැබීම පිළිබඳ ද මෙහිදී සාකච්ඡා කෙරිණි.
එමෙන්ම ශ්‍රී ලංකාව සහ ජපානය අතර පවතින ඓතිහාසික සබඳතාවය මෙහි දී සිහිපත් කළ ජනාධිපති රනිල් වික්‍රමසිංහ දෙරටටම ප්‍රතිලාභ සැලසෙන අයුරින් දෙරට අතර සහයෝගීතාව ශක්තිමත් කර ගැනීම තම අරමුණ බව ද පැවැසීය.
එපමණක් නොව පසුගිය ආර්ථික අර්බුදය හමුවේ ජපානය ශ්‍රී ලංකාව වෙනුවෙන් ලබා දුන් සහාය පිළිබඳ සිය ස්තූතිය පිරිනැමීමට ද ජනාධිපතිවරයා මෙය අවස්ථාවක් කර ගත්තේය.
