ශ්‍රී ජයවර්ධනපුර විශ්වවිද්‍යාලයේ මානව විද්‍යා අධ්‍යයන අංශයේ ජ්‍යේෂ්ඨ මහාචාර්ය දේවිකා යසාංජලි ජයතිලක සඳහන් කළේ දරුවන් ජංගම දුරකථන භාවිතය සම්බන්ධයෙන් මව්පියන් වැඩි සැලකිල්ලක් දැක්විය යුතු බවය.
ජංගම දුරකථනය ලබාදීම වෙනුවට සිදුකළ යුත්තේ දරුවන් ක්‍රීඩා සෞන්දර්ය සඳහා සහ පරිසරය රසවිඳීමට හුරුකරවීම බවද මහාචාර්ය දේවිකා යසාංජලි ජයතිලක සඳහන් කළාය.
එමෙන්ම මෙටා සමාගම සතු වේදිකා ළමුන් තුළ ඇබ්බැහි හැසිරීම් ඇති කරයි යන සැකය මත යුරෝපා සංගමය පසුගිය දා Facebook සහ Instagram පිළිබඳව විධිමත් පරීක්ෂණයක් ද ආරම්භ කර තිබේ.
ඔන්ලයින් යුරෝපීය පරිශීලකයින් ආරක්ෂා කිරීමට සහ නීතිවිරෝධී අන්තර්ගතයන් මැඩපැවැත්වීමට ලොව විශාලතම තාක්ෂණික සමාගම්වලට බල කරන ඩිජිටල් සේවා පනත (DSA) නමින් හැඳින්වෙන දැවැන්ත නීතියක් යටතේ එම පරීක්ෂණය සිදු කෙරෙන බව සඳහන්.
මෙය මෙටා සමාගම පිළිබඳ කෙරෙන දෙවන පරීක්ෂණයවේ.
ෆේස්බුක් සහ ඉන්ස්ටග්‍රෑම් හි ප්‍රචාරයවන සාවද්‍ය තොරතුරුවලට එරෙහිව කටයුතු කිරීමට අපොහොසත් බව චෝදනා කරමින්, පසුගිය මාසයේ යුරෝපීය සංගමය මගින් පරීක්ෂණයක් දියත් කෙරිණි .
තරුණ යුරෝපීයයන්ගේ ශාරීරික හා මානසික සෞඛ්‍යයට අහිතකර බලපෑම් ඇතිවීමේ අවදානම අවම කිරීම සඳහා මෙම විමර්ශනය සිදු කරන බව යුරෝපා සංගමය පවසයි.
කෙසේ වෙතත් තරුණ පරිශීලකයින් ආරක්ෂා කිරීමට මෙටා සමාගම කටයුතු කරන බවට මෙටා ප්‍රකාශකයෙකු පවසා තිබේ.
