එහි වාරිමාර්ග ඉංජිනේරු සකුරා දිල්තාරා මහත්මිය සඳහන් කළේ, මෙම තත්ත්වය ගැන දැඩි විමසිල්ලෙන් කටයුතු කරන ලෙස පහත්බිම්වල වෙසෙන ජනතාවගෙන් ඉල්ලා සිටිය යුතු බවය.
"ලංකාවේ නිරිත දිග ප්‍රදේශ ඔස්සේ ගලා බසින අත්තනගලු ඔය, කළු, ගිං සහ නිල්වලා යන ප්‍රධාන ගංගාවන් අද උදෑසන වනවිටත් ඉහළ ජල මට්ටමක් වාර්තා කරනවා. විශේෂයෙන්ම කළු ගඟේ ඉහළ ධාරා ප්‍රදේශවලට එනම් රත්නපුර හා ඉන් ඉහළ ධාරා ප්‍රදේශවලට සැලකිය යුතු වර්ෂාපතනයක් පැවතීම නිසා මේ වනවිට රත්නපුර හා ඒ අවට ප්‍රදේශවල ජනතාව අවධානයෙන් සිටිය යුතු මට්ටමට ළඟා වී තිබේ. විශේෂයෙන් අද දහවල් හා රාත්‍රියේ තද වැසි ඇති වුවහොත් මේ තත්ත්වය අනතුරුදායක තත්ත්වයකට පත්විය හැකිය. ගිං සහ නිල්වලා ගඟත් අවධානයෙන් සිටිය යුතු මට්ටමට ළඟා වී ඇති අතර ගංවතුර අවධානමක් නොමැති බව පැවසිය හැකියි."
මේ අතර රීමල් සුළි කුණාටුවේ බලපෑම හෙටින් අනතුරුව පහව යනු ඇතැයි කාලගුණ විද්‍යා දෙපාර්තමේන්තුව පවසයි.
එහි අනාවැකි අංශයේ අධ්‍යක්ෂ අජිත් විජේමාන්න මහතා පැවසුවේ, ඉදිරි දින දෙක තුන තුළ නිරිතදිග මෝසම් කාලයේ වැසි පතිත වන දිවයිනේ නිරිතදිග ප්‍රදේශවලට වැස්ස ලැබීම සිදුවන බවයි.
මේ අතර පවුල් 10483 කට අයත් පුද්ගලයින් 39156 දෙනෙකු පීඩාවට පත්ව සිටි.
ඉන් වැඩි ප්‍රමාණයක් වාර්තා වන්නේ ගම්පහ ප්‍රදේශයෙනි.
එම ප්‍රමාණය 5075 කි.
මේ අතර දිස්ත්‍රික්ක 8ක ප්‍රාදේශීය ලේකම් කොට්ඨාස රැසකට නිකුත් කළ නාය යෑමේ අනතුරු ඇඟවීමේ නිවේදනය තවදුරටත් ක්‍රියාත්මකයි.
කොළඹ, ගාල්ල, ගම්පහ, කළුතර, මහනුවර, කෑගල්ල, නුවරඑළිය සහ රත්නපුර දිස්ත්‍රික්කවල ප්‍රාදේශීය ලේකම් කොට්ඨාස රැසක් ඒ අතරට ඇතුළත් ය.
මේ දිනවල ඇදහැලෙමින් පවතින වර්ෂාව හේතුවෙන් වත්තල හැඳල පරණවත්ත ප්‍රදේශයේ ජනතාව ගංවතුරෙන් පීඩාවට පත්ව සිටි.
අප වාර්තාකරු පැවසුවේ, පවුල් 2000ක් පමණ මෙලෙස ගංවතුරෙන් පීඩාවට පත්ව සිටින බවයි.
පවතින අධික වැසි හමුවේ මහනුවර, කෙන්ගල්ල හා මැණික්හින්න යා කෙරෙන හූරීකඩුව ප්‍රධාන මාර්ගයේ නිකකැටිය ප්‍රදේශයේ මාර්ගය ගිලා බැසීමේ අවදානමකට ලක්ව තිබේ.
එම තත්ත්වය හමුවේ රථ වාහන රියැදුරන් හුරීකඩුව මාර්ගය පරිහරණයේදී සුපරික්ෂාකාරී වන ලෙස මැණික්හින්න පොලීසිය රියැදුරන්ගෙන් ඉල්ලා සිටි.
