එම රෙගුලාසි පද්ධතිය පිළිබදව අදාළ පාර්ශ්ව සමග විශේෂ සාකච්ඡාවක් පාර්ලිමේන්තු සංකීර්ණයේදී ඊයේ ( 04) පස්වරුවේ පැවැත්විණි.
අධිකරණ, බන්ධනාගාර කටයුතු ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය, ජනාධිපති නීතිඥ, ආචාර්ය විජයදාස රාජපක්ෂ මහතාගේ සහ වනජීවි හා වන සංරක්ෂණ හා වාරිමාර්ග අමාත්‍ය, නීතිඥ පවිත්‍රාදේවී වන්නිආරච්චි මහත්මියගේ ප්‍රධානත්වයෙන්, ආදිවාසී නායක ඌරුවරිගේ වන්නිලා ඇත්තන්ගේ සහභාගිත්වයෙන් සාකච්ඡාව සිදු විය.
ආදිවාසී ජනතාවට පවතින ගැටළු විසදීම සදහා සකස් කළ නව පනත් කෙටුම්පත අධිකරණ අමාත්‍යවරයා විසින් මේ වන විට අමාත්‍ය මණ්ඩලය වෙත ඉදිරිපත් කර ඇති අතර, පනත සදහා ඇතුළත් කිරීමට නොහැකි කරුණු රෙගුලාසි යටතේ නීතිගත කිරීමට පියවර ගෙන තිබේ.
වනාන්තරවල ඇති ඖෂධ වර්ග ආදිවාසී ජනතාව විසින් නෙලා ගැනීමේදී එම ඖෂධ ආරක්ෂා වන පරිදි කටයුතු කළ යුතු ආකාරය පිළිබදව වනජීවි දෙපාර්තමේන්තුව විසින් රෙගුලාසි පද්ධතියක් සකස් කරමින් පවතින අතර, ඒ පිළිබදව තවදුරටත් අධ්‍යනය කිරීම සදහා විශේෂඥ කමිටුවක් පත් කර තිබේ.
විශේෂයෙන් වන සංරක්ෂණ දෙපාර්තමේන්තුව යටතේ පවතින වනාන්තර ආශ්‍රිතව ජීවත් වන ආදිවාසී ජනතාවට වනාන්තරවල ඖෂධ වර්ග නෙලීමේදී නව රෙගුලාසී පද්ධතියක් කඩිනමින් සකස් කිරීමට මෙහිදී තීරණය වු අතර, සති තුනක් තුළ අදාල රෙගුලාසි පිළිබදව නිර්ණායක ලබාදීමට නියමිතව තිබේ. අදාල ඖෂධ වර්ග නිශ්චිතව නම් කර ඇති අතර, ඖෂධ වර්ග නෙලීම සිදු කළ හැකි ආදිවාසී ජනතාව පිළිබදව වනජීවි අධ්‍යක්ෂ ජනරාල් විසින් අවසර පත්‍රයක් නිකුත් කිරීමට නියමිතව ඇත.
මෙහිදී අදහස් පළ කරමින් අධිකරණ අමාත්‍යතුමා මෙසේ සදහ කළේය.
ආදිවාසී ජනතාවගේ අයිතිවාසිකම් ආරක්ෂා කිරීම පිළිබදව පනත් කෙටුම්පත මේ වන විට අමාත්‍ය මණ්ඩලය සදහා ඉදිරිපත් කර තිබෙනවා. එය සම්මත කිරීම සිදු කිරීමත් ඔවුන් වෙනුවෙන් සකස් කරනු ලබන රෙගුලාසි පද්ධතිය නිතීගත කිරීමත් දෙකම එකවර සිදු කිරීමට නියමිතයි. ඒ නිසා පනත සම්මත කිරීමට රෙගුලාසි පද්ධතිය කඩිනමින් සකස් කළ යුතුයි. පනත සදහා ඇතුළත් කළ නොහැකි කරුණු රෙගුලාසි යටතේ නීතිගත කිරීම සිදු කිරීමට නියමිතයි. සියලු පාර්ශ්ව සමග සාකච්ඡා කිරීමෙන් පසුව එක්සත් ජාතීන්ගේ ප්‍රඥප්තියට අනුකූලව මෙම පනත සකස් කර තිබෙනවා. ආදිවාසී ජනතාව පිළිබදව මානුෂිය ආකාරයෙන් සලකා බලා නව පනත් කෙටුම්පත සම්මත කිරීම කඩිනමින් පියවර ගැනීම සියලු දෙනා සතු වගකීමක් බව ද අමාත්‍යතුමා සදහන් කළේය.
උතුරු, උතුරු මැද හා නැගෙනහිර පළාත්වල ප්‍රාදේශිය වශයෙන් ජීවත්වන ආදිවාසී ජනතාව පිළිබදව අවධානය යොමු කරමින් ඔවුන් ජීවත් වන ප්‍රදේශ නිශ්චිතව හදුනා ගෙන ප්‍රාදේශියව වනාන්තර ආශ්‍රිතව තම ජීවිකාව කර ගෙන යාම සදහා ඔවුන්ට පහසුකම් සැලසීමට කටයුතු කිරීම, වන සංරක්ෂණ දෙපාර්තුව යටතේ පවතින වනාන්තර ආශ්‍රිතව ජීවත් වන ආදිවාසී ජනතාව සදහා ඖෂධ නෙලීම වෙනුවෙන් නව රෙගුලාසි පද්ධතියක් සකස් කිරීමටත් මෙහිදී අවධානය යොමු විය.
තම ජනතාව පිළිබදව සලකා බලා කඩිනමින් පනත් කෙටුම්පත සම්මත කිරීමට කටුයුතු කරන ලෙස ඉල්ලා සිටින අතර, ඒ සදහා කටයුතු කරන අධිකරණ අමාත්‍යතුමා ඇතුළු සියලු දෙනාට ස්තූතිය පළ කරන බව මෙහිදී අදහස් පළ කරමින් ආදිවාසී නායක ඌරුවරිගේ වන්නිලැ ඇත්තන් මෙහිදි සදහන් කළේය.
වනජීවි හා වන සංරක්ෂණ, වාරිමාර්ග අමාත්‍ය, නීතිඥ පවිත්‍රා දේවී වන්නිආරච්චි මහත්මිය ද මෙහිදී අදහස් පළ කළාය.
වනජීවි අධ්‍යක්ෂ ජනරාල් චන්දන සුරිය බණ්ඩාර මහතා ඇතුළු නිතිපති දෙපාර්තමේන්තුව, වනජීවි හා වන සංරක්ෂණ අමාත්‍යාංශය, වනජීවි දෙපාර්තමේන්තුව, අධිකරණ අමාත්‍යාශය හා විකල්ප ප්‍රතිපත්ති කේන්ද්‍රය නියෝජනය කරමින් නිලධාරීන් මෙම සාකච්ඡාව සදහා එක්ව සිටියහ.
- දිනමිණ
