අගවිනිසුරුවරයා මේ බව පවසා සිටියේ ඉකුත් වසරේ මාර්තු මස 09 වනදා පැවැත්වීමට නියමිතව තිබූ පළාත් පාලන ඡන්ද විමසීම නොපැවැත්වීමට අදාලව ජනතාවගේ මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙස ඉල්ලා ගොනු කළ මූලික අයිතිවාසිකම් පෙත්සම අද විභාගයකට ගත් අවස්ථාවේදීය.
පළාත් පාලන ඡන්ද විමසීමය කල් දැමීමට එරෙහිව සමගි ජන බලවේගය, ජාතික ජන බලවේගය, විකල්ප ප්‍රතිපත්ති කේන්ද්‍රය සහ පැෆරල් ආයතනය විසින් ගොනු කරනු ලැබූ පෙත්සම් අද අගවිනිසුරු ජයන්ත ජයසූරිය, විජිත් මළල්ගොඩ, මුර්දු ප්‍රනාන්දු, ගාමිණී අමරසේකර සහ යසන්ත කෝදාගොඩ යන මහත්ම මහත්මීන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම විභාගයට ගන්නා ලදී.
එහිදී මැතිවරණ කොමිසමේ සභාපතිවරයා හා සාමාජිකයින් වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණය හමුවේ කරුණු දක්වමින් පළාත් පාලන ඡන්ද විමසීම නියම කළ පරිදි පැවැත්වීමට අවශ්‍ය සියලු ක්‍රියාමාර්ග ගත් බව කියා සිටියේය. පළාත් පාලන ඡන්ද විමසීම පැවැත්වීම සඳහා මුදල් ප්‍රතිපාදන මුදා නොහැරීම හේතුවෙන් මතුවී තිබෙන අපවාදයෙන් ගැලවීම සඳහා රජය විසින් මැතිවරණ කොමිසම වෙත චෝදනා එල්ල කිරීමට පටන් ගෙන ඇතැයි සඳහන් කළ ජනාධිපති නීතිඥවරයා පළාත් පාලන ඡන්ද විමසීම පැවැත්වීමට අදාළව සියලු තීරණ ගනු ලැබුවේ මැතිවරණ කොමිසමේ බහුතර සාමාජිකයින්ගේ එකගත්වයෙන් බවත් කීවේය.
