ශ්‍රී ලංකාව ඊයේ එළැඹි ණය ප්‍රතිව්‍යුහගතකරණ ගිවිසුම් සම්බන්ධයෙන් ඉන්දියාව සහ මෙරට අමෙරිකානු තානාපතිනියද අද (27) සිය ප්‍රසාදය පළ කර තිබේ.

ඉන්දීය විදේශ කටයුතු අමාත්‍යාංශය නිවේදනයක් නිකුත් කරමින් පවසන්නේ ශ්‍රී ලංකාවේ ආර්ථික පුනර්ජීවනය, වර්ධනය සහ ස්ථාවරත්වය උදාකරලීම උදෙසා නොසැලී කැපවී සිටින බවය.

එසේම ශ්‍රී ලංකාවේ අමෙරිකානු තානාපතිනි ජුලි චන්ග් මහත්මියද ඊයේ ශ්‍රී ලංකාව එළඹුණු ණය ප්‍රතිව්‍යුහගතකරණ ගිවිසුම් අමෙරිකාව සාදරයෙන් පිළිගන්නා බව X අවකාශයේ සටහනක් තබමින් සඳහන් කර තිබේ.

එම ගිවිසුම් මෙරට මූල්‍ය පරිසරය පිළිබද විශ්වාසයක් ගොඩනැංවීමට ඉවහල්වන බව ඇය තැබූ සටහනේ සඳහන් ය.

මේ අතර මෙරට නිල ණය හිමියන්ගේ කමිටුවට අයත් පැරිස් සමාජය නිකුත් කළ නිවේදනයේ දැක්වෙන්නේ ශ්‍රී ලංකාව තිරසාර වර්ධන මාවතකට අවතීර්ණ කිරීම සඳහා මෙරට බලධාරීන් අවශ්‍ය ප්‍රතිසංස්කරණ ක්‍රියාවට නැංවීමට දරන ප්‍රයත්නය ප්‍රශංසනීය බවය.

2022 වසරේ අප්‍රේල් 12 වනදා ශ්‍රී ලංකාව ණය ගෙවීමේ හැකියාවක් නොමැති බවට නිවේදනය කරන අවස්ථාවේ ලක් රජයට අමෙරිකානු ඩොලර් බිලියන 37ක පමණ විදෙස් ණය ගෙවීමට ඉතිරිව තිබුණි.

ඒ අතරින් ව්‍යාපෘති හෝ වැඩසටහන් සඳහා ලබාගත් ණය ප්‍රමාණය අමෙරිකානු ඩොලර් බිලියන 22.3ක් වූ අතර වාණිජ ණය ප්‍රමාණය අමෙරිකානු ඩොලර් බිලියන 14.7කි.

ව්‍යාපෘති හෝ වැඩසටහන් ණයවලින් අමෙරිකානු ඩොලර් බිලියන 11.7ක් බහුපාර්ශ්වීය ණය වන අතර අමෙරිකානු ඩොලර් බිලියන 10.6ක් ද්විපාර්ශ්වික ණය වෙයි.

එම ණයවලින් ද්වීපාර්ශ්වික ණයහිමියන්ගේ නිල කමිටුවට අයත් රටවල් 17ක අමෙරිකානු ඩොලර් බිලියන 5.8ක ණය සහ චීනයට අයත් අමෙරිකානු ඩොලර් බිලියන 4.2ක ණය වශයෙන් අමෙරිකානු ඩොලර් බිලියන 10 ක ණය ප්‍රමාණයක් ප්‍රතිව්‍යුහගතකරණයට ඊයේ එකඟතාව පළවුණි.

මෙලෙස ප්‍රතිව්‍යුහගතකරණයට ලක් කෙරුණු මුළු ණය ප්‍රමාණය මෙරට සමස්ත විදෙස් ණයවලින් 27% ක ප්‍රතිශතයකි.

එම ණයවලින් කොටසකට ගෙවීමට සහන කාලයක් හිමි වන අතර ණය වාරික සහ පොලී ගෙවීමේ කාලයද දීර්ඝ කර තිබේ.

මේ අතර මෙරට විදේශ ණය ප්‍රතිව්‍යුහගතකරණය සඳහා ශ්‍රී ලංකාව ඊයේ එළඹුණු ගිවිසුම් පිළිබඳව ඉන්දියාව සිය ප්‍රසාදය පළ කරයි.

-DERANA