ඥාති සහෝදරියගේ අමානුෂික පහරදීමට ලක් වූ බිළිඳා කළුබෝවිල ශික්ෂණ රෝහලට ඇතුළත් කිරීමෙන් පසු ඊයේ පස්වරුවේ මියගිය බව පොලිසිය පැවසුවේය.
22 හැවිරිදි එම තරුණිය බිළිඳාගේ පියාගේ වැඩිමහල් සහෝදරියකගේ දියණියකි. මේ වන විට කහතුඩුව පොලීසිය ඇය අත්අඩංගුවට ගෙන තිබේ.
සිද්ධියෙන් බරපතල තුවාල ලැබූ බිළිදා මුලින්ම ප‍්‍රතිකාර සඳහා වෑතර රෝහලට ඇතුලත් කර ඇත. අනතුරුව තත්ත්වය බරපතල නිසා බිළිදා කළුබෝවිල ශික්ෂණ රෝහලට මාරු කර යැවුණු අතර එහි ශල්‍ය දැඩි සත්කාර ඒකකයේ ප‍්‍රතිකාර ලබමින් සිටියදි ජීවිතක්ෂයට පත්ව තිබේ.
දෙමළ ජාතිකයන් වූ මෙම පිරිස පොල්ගස් ඕවිට - අම්බලන්ගොඩ ප‍්‍රදේශයේ පදිංචියට පැමිණ ඇත්තේ මීට මාස කිහිපයකට පෙරය. බිළිදා රැකබලා ගැනීම සඳහා ඔවුන් ඥාති දියණිය නිවසට කැදවාගෙන විත් තිබේ.
මිය ගිය බිළිදාගේ පියා වන පෙරියතම්බි යෝගරාජන් කියා සිටියේ තම ඥාති දියණිය මානසික ආබාධයකින් පෙළුණු බවයි.
මේ අතර, සැකකාර තරුණිය අත්අඩංගුවට යන අවස්ථාවේදී ඇය ආවේශ වූ ආකාරයකින් හැසිරුණු බව කහතුඩුව පොලීසියේ ප‍්‍රකාශකයෙකු සදහන් කළේය..
බිළිදාගේ ජීවිතය රැක ගැනීමට සියලූ උත්සාහයන් දැරූ බව කළුබෝවිල ශික්ෂණ රෝහලේ අධ්‍යක්ෂ වෛද්‍ය අසේල ගුණවර්ධන ප‍්‍රකාශ කළේය.
මියගිය බිළිඳාගේ පශ්චාත් මරණ පරීක්ෂණය කළුබෝවිල ශික්ෂණ රෝහලේදී අද සිදුකිරීමට නියමිතය.
